Шьамтәылатәи Арабтә республика Адәныҟатәи аусқәеи аҳәаанырцә инхо аџьынџьуаа рызҵаарақәеи рминистр Феисал Микдади Аԥсны адәныҟаполитикатә усбарҭа ахада Инал Арӡынбеи реицҳәамҭа

1.Аԥсны Аҳәынҭқарреи Шьамтәылатәи Арабтә Республикеи, аринахыс Аганқәа ҳәа хьӡыс изауа адгылара рырҭоит Украина имҩаԥысуа арратә операциа ҷыдеи злахьынҵа зхала иҳәаақәызҵар зҭаху ДЖәРи ЛЖәРи егьырҭ Украина арегионқәеи руааԥсыреи. Аганқәа адгылоит аоперациа ҷыда – еиҳа ииашоу адунеитә еиҿкаара ашьақәыргылара иазырхоуп ҳәа ишьаны.

2.Аганқәа ақәыӡбоит Мраҭашәаратәи атәылақәа Аԥсны Аҳәынҭқарреи, Шьамтәылатәи Арабтә Республикеи, Урыстәылатәи Афедерациеи егьырҭ иаартны зҿахәы зҳәо атәылақәеи ирзыҟарҵо ақәыӷәӷәара, жәларбжьаратәи аилазаара азхьадырԥшуеит арҭ ақәыӷәӷәарақәа азакәан шьаҭа шрымам, ишҵакыдоу.

3. Аԥсны Аҳәынҭқарреи Шьамтәылатәи Арабтә Республикеи рыжәларқәа аӡәыкны иҟоуп жәларбжьаратәи атерроризм аҿагылараҿы. Аганқәа иазгәарҭоит атеррористтә гәыԥқәа жәпакы мраҭашәаратәи аҳәынҭқаррақәа ишаԥырҵази иахьагьы урҭ рҟынтәи адгылара шроуеи.

4.Аганқәа ааԥхьара ҟарҵоит Шьамтәылатәи Арабтә Республика аҵакыра аанрыжьырц илигитимтәым аҳәаанырцәтә еиҿкаарақәа.

5.Аганқәа рыдәныҟаполитикатә усҳәарҭақәеи рдипломатиатә миссиақәеи реинырра ахәҭаны ирыԥхьаӡоит евразиатәи аинтеграциа аиԥш аинтерес ззеицрымоу азҵаарақәа рҿы.
6.Аганқәа аицнаплакқәа реиҿкаара амҩала ахәаахәҭра-економикатә еизыҟазаашьақәа рырӷәӷәаразы иқәгылоит.

7.Аганқәа рыжәларқәа акультуратә еинырреи аибарбеиареи ринтерес шрымоу дырны аҵак ду арҭоит акультуреи атуризми русхкқәа рҿы аусеицура, аҿар рыбжьара адиалог арҭбаара, аҵареи аҭҵаарадырреи русхк аҟны аусеицура.