Хәажәкыра 25-26, 2021 шықәсазы Женева имҩаԥысит изаамҭанытәиу Аахыҵ Кавказ ашәарҭадареи аҭышәынтәалареи рзы Женеватәи аиҿцәажәарақәа 52-тәи рраунд. Иара иалахәын: Аԥсны, Аахыҵ Уаԥстәыла, Қырҭтәыла, Урыстәыла, ЕАА, ООН, ОБСЕ, ЕС аҟынтәи ацхантәаҩцәа.
Аԥсны Аҳәынҭқарра аделегациа иалахәын: Адәныҟатәи аусқәа рминистр ихаҭыԥуаҩ Иракли Ҭыжәба, Аԥсны ахада Иусбарҭа анапхгаҩ ихаҭыԥуаҩ Саида Быҭәԥҳа, Аԥсны АШәМ ахантәаҩ ихаҭыԥуаҩ Заал Хәарцкьиа, Апарламент адепутатцәа –Рауль Лолуа, Асҭамур Логәуа, Лаша Ашәба, Аԥсны Адәныҟатәи аусқәа рминистрра аусзуҩцәа Лаша Аҩӡба, Артур Гагәылиа, Мадина Шамԥҳа.
Аахыҵ Кавказ ашәарҭадареи аҭышәынтәалареи рзы Женеватәи аиҿцәажәарақәа 52-тәи рраунд аҟны иалацәажәан амч ахамырхәаразы адокумент аицеиқәшаҳаҭра аус адулара азҵаара.
Аԥсны ахаҭарнакцәа ақырҭуа ган иадыргалеит ҿырҳәалатәи аицҳәамҭа авариант ҿыц, аха ақырҭуа ган аҽазныкгьы мап ацәнакит аԥсуа ган ажәадгала.
Аҽазныкгьы, ақырҭуа ган ахымҩаԥгашьа иалнамыршеит абри азҵаараҿы акы азеицнеира.
Аԥсни Қырҭтәылеи, Аахыҵ Уаԥстәылеи Қырҭтәылеи рҳәааҟны аҭагылазаашьа аилатәара алахәылацәа зегьы, ақырҭуа ган ада, иҭышәынтәалоу ҳәа ахәшьара арҭеит. Ахәшьара бзиа аҭан аԥсынтәи амчрақәа иаԥырҵаз агуманитартә коридор.
Убри аан аиԥылара алахәылацәа зегьы еицҿакны иазгәарҭеит ԥхьаҟазы ашьаҿақәа реицеихгара ада ԥсыхәа шыҟам.
Аԥсуа ган аҽазныкгьы аҳәамҭа ҟанаҵеит наҟ-ааҟ аинтерес ззеицрымоу азҵаарақәа ишрылацәажәалатәу азы.
Иалацәажәан COVID-19 аламырҵәара азҵаара. Аԥсуа ган Урыстәылатәи Афедерациеи жәларбжьаратәи аиҿкаарақәеи рганахь ала имҩаԥысуа ацхыраара ҭабуп ҳәа ахырҳәааит. Иазгәаҭан ареспубликаҿы авирус лаҟәуа ишалагаз, хара имгакәа арахь ишаагахо урыстәылатәи алаҵа Спутник V.
Аԥсуа ган иазгәанаҭеит ЕАА Қырҭтәыла аҵакыраҿы арра-техникатә усеицура еиҳа-еиҳа иахьарҭбаауа агәҭынчымра шцәырнаго, уи заанкылара уадаҩхо аҭагылазаашьахь икылнагар шалшо.
Убри инадҳәаланы Аԥсни Урыстәылеи рырратә усеицура ишацҵахо азгәаҭан.
Аҩбатәи аусутә гәыԥ аусура аҳәаақәа ирҭагӡаны ирылацәажәан агуманитартә зҵаарақәа, хаҭала ирзааҭгылан аԥснытәи амилаҭтә тәылауаҩшәҟәқәа адунеи аҟны аныҟәараан ахрархәара азҵаарақәа, аҵара, амедицина рызҵаарақәа.
Аиԥылара хыркәшо аганқәа еиқәшаҳаҭхеит актуалтә зҵаарақәа рылацәажәара ԥхьаҟагьы имҩаԥгалазарц.
Аахыҵ Кавказ ашәарҭадареи аҭышәынтәалареи рзы Женеватәи аиҿцәажәарақәа 53-тәи рраунд азыԥхьагәаҭоуп 2021 шықәса рашәара 29-30 рзы.