Аахыҵ Уаԥстәылатәи Ареспублика иаҿагыланы Қырҭтәыла агрессиа амҩаԥгара 14 шықәса ахыҵра инадҳәаланы Аԥсны Адәныҟатәи аусқәа рминистрра Аахыҵ Уаԥстәыла Адәныҟатәи аусқәа рминистрра адышшыларатә шәҟәы азынанашьҭит.
Ашәҟәаҿы иазгәаҭоуп:«2008 шықәса нанҳәа 8 ахааназгьы Аахыҵ Уаԥстәыла аҭоурых адаҟьаҿы игәыҭшьаагоу рыцхәны иаанхоит. Ауаԥсжәлар фырхаҵарыла, иаӡәыкны еидгылеит аӷа иҿагыланы. Ацхыраара рызҭаз Урыстәылатәи Афедерациеи дареи рыжәҩа еибыҭаны агрессор имчқәа хырҽит.
Абри агәырҩамш аҽны Аԥсны ажәлар Аахыҵ Уаԥстәыла ахьчаҩцәеи аҭынч уааԥсыреи ргәаладыршәоит».