Урыстәыла Адәныҟатәи аусқәа рминистр Сергеи Лавров ателеграмма изааишьҭит COVID-19 здырбалаз иколлега – Аԥсны адәныҟатәи аусқәа рминистр Даур Ақаҩба.
Ателеграмма атекст аҿы иазгәаҭоуп:
«Акоронавирустә инфекца шәыдырбалеит ҳәа исаҳаз ажәабжь сгәы снархьит. Ишәзеиӷьасшьар сҭахуп иаарласны шәгәабзиара еиҭашьақәгыларц.
Агәрагара сымоуп ҳҩызаратә ҳәынҭқарраҿы COVID-19 апандемиа ишаиааиуа, ҳтәылақәа рыҩбагьы рмедицинатә усзуҩцәа жәҩахыреибыҭала русура иалыршаны.
Ԥхьаҟагьы Аԥсни Урыстәылеи рыдәныҟаполитикатә усбарҭақәа русеицура ишацҵахо азы гәыҩбара сымам».