Хәажәкыра 3 рзы, Сҭампыл, Урыстәылатәи Афедерациа Аҳәынҭқарратә Консулраҿы имҩаԥысит Ҭырқәтәылатәи Ареспублика иҟоу Аԥсны Аҳәынҭқарра азинмчнагӡа змоу ахаҭарнак Ибраҳим Аҩӡбеи Сҭампыл иҟоу Урыстәылатәи Афедерациа Аҳәынҭқарратә консул Андреи Буравови реиԥылара.
Аиԥылара иара убасгьы иалахәын Ҭырқәтәылатәи Ареспублика иҟоу Аԥсны Аҳәынҭқарра азинмчнагӡа змоу Ахаҭарнакра аполитикатә зҵаарақәа рзы абжьгаҩ Џьансыхә Лазбеи Урыстәылатәи Афедерациа Аҳәынҭқарратә Консулра аконсул ихаҭыԥуаҩ Антон Скворцови.
Аиԥылара иаман итрадициатәу аиҩызаратә ҟазшьа ҟәанда, ирылацәажәан аусбарҭабжьаратә еинырра азҵаарақәа асоциал-гуманитартә, аекономикатә, акультуратә усхкқәа рҿы.
Ибраҳим Аҩӡба далацәажәеит Сҭампыл ақалақь ахадара злахәны 2024 шықәса жәабран 29 инаркны хәажәкыра 3 рҟынӡа имҩаԥысуаз ауснагӡатәқәа ртәы.
Ауснагӡатә иалахәын Ҭамила Мерцхәылааԥҳа зхадараҿы дыҟаз Аԥсны Ахәаахәҭра-ааглыхратә палата аделегациа.
Аиԥылараҟны иазгәаҭан Аԥсны асеиԥш иҟоу ауснагӡатәқәа ралахәра аҵакы шамоу аимадарақәа рырҭбааразы.
Хаз ҷыдала иазааҭгылан Кавказтәи, Черкесстәи, Аԥсуеи федерациақәа реинырра, иҳәан Мраҭашәаратәи НПОқәа кавказтәи аетнос ахаҭарнакцәа еидызкыло ауаажәларратә еиҿкаарақәа русура иҵоурам анырра шазыруа, иаҳҳәап Аԥсни Урыстәылеи рыдәныҟаполитикатә курс иақәымшәо апроектқәа ралагаларала.
Хазы иазааҭгылан Ҭырқәтәыла иатәылауаау аԥсуа-адыгаа рхылҵшьҭрақәа атәылауаҩшәҟәқәа роура азҵаара.
Аԥсны ахаҭарнак иҳәеит аԥсуа тәылауаҩшәҟәы адиаспора ахаҭарнакцәа рзы ишармариоу Урыстәыла иалсны Аԥсныҟа рнеира.
Ибраҳим Аҩӡба иколлега Андреи Виачеслав-иԥа днеиԥхьеит апровинциа Сакариа иатәу аԥсуа қыҭа Балбалы даҭаарц.
Ақыҭа ауааԥсыра ираԥшьгамҭоуп официалла Аконсулра ахаҭарнакцәа аԥсуеишәа аформат ала рԥылара аиҿкаара.