Аԥсны Адәныҟатәи аусқәа рминистр Инал Арӡынба Аахыҵ Уаԥстәылатәи Ареспублика Адәныҟатәи аусқәа рминистр Ахсар Џьиоев имшира идиныҳәалеит.

Адныҳәалараҟны иазгәаҭоуп:

«Ҳаҭыр зқәу Ахсар Мураҭ-иԥа!

Ишәыдышәкыл шәымшира аҽны иреиӷьӡоу азеиӷьашьарақәа!

Шәара шәыԥсҭазаара зегьы адипломатиатә ус иадҳәалоуп, Аԥсадгьыл аинтересқәа шәыхьчоит.

Иазгәасҭар сҭахуп Аԥсни Аахыҵ Уаԥстәылеи реизыҟазаашьа бзиаз шәлагала дуқәа.

Аԥсны Аҳәынҭқарраҟны ҳаҭыр ду ақәуп ҳажәларқәеи ҳтәылақәеи еидызҳәало аиҩызаратәи аиашьаратәи еимадарақәа.

Агәра ганы сыҟоуп ԥхьаҟагьы Аԥсни Аахыҵ Уаԥстәылеи рҳәынҭқаррабжьаратә еизыҟазаашьа алшара ду шамоу, уи иахәҭаку адәныҟаполитикатә усбарҭақәа реинырра ҳажәларқәеи ҳтәылақәеи ринтересқәа ишрыҵанакуа».