Аԥсны Адәныҟатәи аусқәа рминистр Инал Арӡынбеи Шьамтәыла иҟоу азинмчра нагӡеи анапынҵа ҷыдақәеи змоу Иемен ацҳаражәҳәаҩ Абдалла Али Сабрии онлаин-еиԥылара рыман.
Арӡынба инаҵшьны иазгәеиҭеит ареспублика адәныҟатәи аполитикаҿ аҵак ду шамоу Мрагылара Ааигәа атәылақәа рзааигәахара ахырхарҭа.
"Мрагылара Ааигәа атәылақәеи ажәларқәеи аҭоурых ду рымоуп, аекономикатә лшарақәа рымоуп. Убри инадҳәаланы акраҵанакуаны иаҳшьоит ҩ-ганктәи ганрацәалатәи аиныррақәа рышьақәыргылара. Уи адагьы ҳара жәларбжьаратәи аизыҟазаашьақәа рҟны ахырхарҭарацәатә система ҳадгылаҩцәоуп", - иҳәеит Арӡынба.
Иемен ацҳаражәҳәаҩ иҳәеит ахәаахәҭра-економикатә усхк аҟны аизыҟазаашьақәа рырҿиара ринтерес шимоу.
Аиԥылараан Аганқәа еиқәышаҳаҭхеит рдиалог ԥхьаҟагьы ацҵара аҭахны ишыҟоу.