2023 шықәса ԥхынҷкәын 11 рзы Дамаск, Аԥсны Адәныҟатәи аусқәа рминистр Инал Арӡынба Шьамтәылатәи Арабтә республикахь аусутә ныҟәара аҳәаақәа ирҭагӡаны имҩаԥысит Аԥсны Адәныҟатәи аусқәа рминистр Инал Арӡынбеи Шьамтәылатәи Арабтә республикаҿ инхо аԥсуа-абазеи ачерқьес диаспореи иара убасгьы ШьАР аҿы иҟоу ачерқьестә гәыҳалалратә ассоциациа адиректорцәа рхеилаки реиԥылара.
Аиԥылараан Инал Арӡынба еизаз ирзеиҭеиҳәеит арегионалтәии адунеижәларбжьаратәии амшхәаԥштә зҵаарақәа ртәы, аԥсны-шьамтәылатә еизыҟазаашьақәа распектқәа ртәы, инаҵшьны иазгәеиеҭит ШьАР иҟны инхо аԥсуа-абазеи ачерқьес диаспора Аԥсни Шьамтәылеи реизыҟазаашьақәа рырӷәӷәараҿы инарыгӡо ароль.
Иара убасгьы аминистр иҳәеит Аԥсни Шьамтәылеи рыстратегиатә дгылаҩ Урыстәылеи аколлективтә Мраҭашәара раҿагылара аҵакы, еиҳа ииашоу адунеитә хырхарҭарацәатә еиҿкаара аҵакы адура, дазааҭгылеит Қырҭтәыла амч ахамырхәаразы адокумент анапаҵаҩра ишаԥырхаго аколлективтә Мраҭашәара атәылақәа.
Шьамтәылатәи Арабтә республикаҿ инхо аԥсуа-абазеи ачерқьес диаспора рхаҭарнакцәа ШьАРеи Мрагылара Ааигәеи инхо аԥсуеи ачерқьеси уаԥшьқәа ргәы змырҭынчуа азҵаарақәа цәырыргеит.
Аиԥылара иалахәыз инаҵшьны иазгәарҭеит Дамаск иҟоу Аԥсны Ахаҭарнакра имҩаԥнаго аусқәа хра шрылоу.
Аиԥылара иалахәын Шьамтәылатәи Арабтә республикаҿ иҟоу Аԥсны азинмчнагӡа змоу ацҳаражәҳәаҩ Мухаммад Алии Аԥсны АдәАР Аконсултә департамент аиҳабы Лаша Аҩӡба.
