Приднестровие иҟоу Аԥсны Азинмчы змоу ахаҭарнак Александр Ватамани Приднестровиа актәи Ахада Игор Смирнови реиԥыларазы

Приднестровие иҟоу Аԥсны Азинмчы змоу ахаҭарнак Александр Ватамани Приднестровиа актәи Ахада Игор Смирнови реиԥыларазы
20 January 2025 51

Ҳазҭоу ашықәс ажьырныҳәа 20 рзы Приднестровиа Молдавиатәи Ареспублика актәи Ахада икабинет аҿы Игор Смирнови Приднестровиа иҟоу Аԥсны Аҳәынҭқарра Азинмчы змоу ахаҭарнак Александр Ватамани реиԥылара мҩаԥысит.

Аиԥылара рхы аладырхәит Приднестровие Иреиҳаӡоу Ахеилак Актәи Ааԥхьара адепутатцәа Владимир Рилиаков, Владимир Емелианов, Виачеслав Загриадски. Аиԥылара, Аԥсны Аҳәынҭқарреи Приднестровиатәи Молдавиатәи Ареспубликеи рыбжьара аиҩызареи аусеицуреи рзы Аиқәшаҳаҭра анапаҵыҩра 32 шықәса ахыҵра иазкын.

1993 шықәса ажьырныҳәамза 22 рзы Аԥсны Аҳәынҭқарра Иреиҳаӡоу Ахеилак Ахантәаҩы Владислав Арӡынбеи Приднестровиа Молдавиатәи Ареспублика Ахада Игор Смирнови ирыбжьарҵаз Аиқәшаҳаҭра хадаратә документны иҟалеит, Аԥсны Аҳәынҭқарреи Приднестровиеи рыбжьара аизыҟазаашьақәа рышьақәгыларазы. Ари аусшәҟәы Аԥсни Приднестровиеи рыбжьара аиҩызареи наҟ-ааҟгьы ринтересқәа рызхәыцреи шьаҭас измаз аизыҟазаашьақәа рыстратегиатә, рпартниортә ҟазшьа шьақәнаргылеит.

Аиԥылара алахәылацәа иргәаладыршәеит 1993 шықәса, ажьырныҳәамзазы Аиқәшаҳаҭра анапаҵыҩра шымҩаԥысыз. 1993 шықәса ажьырныҳәамза 21 рзы Тираспольҟа инеиит Аԥсны Аҳәынҭқарра Иреиҳаӡоу Ахеилак адепутатцәа ргәыԥ. Урҭ уахь инаргеит Аԥсны Аҳәынҭқарра Иреиҳаӡоу Ахеилак Ахантәаҩы Владислав Григори-иԥа Арӡынба инапы зҵаиҩыз Аиқәшаҳаҭра атекст.

Аԥснытәи аделегациа дырԥылеит, иагьымҩаԥигон усҟан Приднестровтәи Иреиҳаӡоу Ахеилак адепутатс иҟаз, Тирасполь ақалақьтә жәлар рдепутатцәа Рхеилак напхгара азҭоз Владимир Рилиаков.

Приднестровтәи аган ахьӡала Аиқәшаҳаҭра инапы аҵаиҩит Приднестровиа Молдавиатәи Ареспублика Ахада Игор Смирнов. Аиқәшаҳаҭра анапаҵаҩра мҩаԥысит Аҳәынҭқарра Ахада иусбарҭаҿы, Приднестровтәи адепутатцәеи Аԥснытәи аделегациеи алахәны.

1993 шықәса жьҭаарамза 26 рзы Приднестровиа Иреиҳаӡоу Ахеилак Аиқәшаҳаҭра шьақәнарӷәӷәеит.
1993 шықәса ажьырныҳәамзазы Аԥснытәи аделегациа Приднестровие рнеираан иара убасгьы еиибашьуаз Аԥсны ацхыраараз азҵаарақәа ирылацәажәон. 1992-1993 шықәсқәа рзтәи Аԥсны Жәлар Рџьынџьтәылатә еибашьраан Приднестровиантәи Аԥсныҟа иаауан хатәгәаԥхаралатәи аибашьыҩцәа, аҳәынҭқарратә ҩаӡарала Приднестровие аматериалтәи атехникатәи цхыраара ҟанаҵон.

Аиԥылараҿы Игор Смирнов, Владимир Рылиаков, Владимир Емелианов, Виачеслав Загриадски Аԥсны Аҳәынҭқарра аҭагылазаашьа, уи алхратә аамҭа, Аԥсныжәлар рыԥсҭазаара иадҳәалоу уҳәа егьырҭ атемақәа жәпакы азҿлымҳара рзаадырԥшит. Александр Ватаман арҭ азҵаарақәа зегьы инарҭбааны рҭак ҟаиҵеит.

Приднестровие иҟоу Аԥсны Аҳәынҭқарра Азинмчы змоу ахаҭарнак Александр Ватаман Игор Смирнови актәи Ааԥхьара адепутатцәеи, Приднестровие анапхгареи Аԥсны имҩаԥысуа апроцессқәа рызхьаԥшразы, ҳреспубликақәа русеицура аамҭа зегьы иалагӡаны иааиԥмырҟьаӡакәа иҟарҵо адгыларазы ҭабуп ҳәа реиҳәеит.
Игор Смирнов Аԥсны аиашьаратә жәлар актәи Аиқәшаҳаҭра анапаҵыҩра ашықәсхыҵратә мшы рыдиныҳәалеит. Аԥсны Аҳәынҭқарреи иқәынхо ауааԥсыра зегьи аҭынч жәҩани аизҳазыӷьареи рзеиӷьеишьеит.

Аиԥылара ахыркәшамҭаз Александр Ватаман Игор Смирнов ҳамҭас ииҭеит агәалашәаратә фотоальбом “Аиааиреи” аԥсуа жәаԥҟақәа реизгеи.
X

Форма обратной связи

ФИО:
E-MAIL:
Телефон:
Ваше сообщение: