Ажьырныҳәа 20 рзы ПМР Адәныҟатәи аусқәа рминистрраҟны имҩаԥысит Приднестровиатәи Молдавиатәи Ареспублика Адәныҟатәи аусқәа рминистр Витали Игнатиеви ПМР иҟоу Аԥсны Аҳәынҭқарра азинмчы змоу ахаҭарнак Александр Ватамани русуратә еиԥылара.
Аиԥылара аартуа, ПМР Адәныҟатәи аусқәа рминистр Витали Игнатиев аҩганктәи аинырра иахьазы иамоу аҩаӡара ахә ҳаракны ишьеит, уаанӡатәи амаҭәартәи аконструктивтәи ҟазшьа инақәыршәаны ԥхьаҟагьы уи ацҵара шхымԥадахоу азы агәрагара ааирԥшит. ПМР Адәныҟатәи аусқәа рминистр ҷыдала ахшыҩзышьҭра аиҭеит ареспубликақәа рыдәныҟаполитикатә усбарҭақәа рыбжьара аимадара аҿиара. Ари аконтекст аҿы Витали Игнатиев ҵыԥх адипломат ҿарацәа рхеилакқәа рганахь ала имҩаԥысуаз аимадарақәа ахәшьара бзиа риҭеит.
Аҭактә ажәаҿы ПМР иҟоу Аԥсны Аҳәынҭқарра азинмчы змоу ахаҭарнак Александр Ватаман иҳәеит: "Ашықәс ҿыц азы раԥхьатәи ҳаиԥылара традициала имҩаԥысуеит Владислав Арӡынбеи Игор Смирнови рнапы зҵарҩыз раԥхьатәи аҳәынҭқаррабжьаратә еиқәшаҳаҭра анапаҵаҩра амшқәа раан. Абар, шьҭа, 33 шықәса ҵуеит ҳреспубликақәа ихьыԥшым аҳәынҭқаррақәа рыргылара амҩа еицықәуижьҭеи. Ари амҩаҿы иҟан иуадаҩызи аҳәынҭқаррабжьаратә усеицураз акыр ишьахәызи аамҭақәа. Агәра ганы сыҟоуп 2026 шықәсазы ҳреспубликақәа русеицуразы иҟоу алшарақәа зегьы иахьынӡауа хра рыманы ахархәара шроуа, урҭ рхархәара приднестровиатәии аԥснытәии адипломатиақәа реицҽазышәарақәа акыр ишҳәаақәырҵо».
Аиԥылараан аганқәа алацәажәеит еиуеиԥшым ахырхарҭақәа рыла аԥсны-приднестровиатәи усеицура аизырҳараз алшарақәа, апрактикатә усмҩаԥгатәқәеи аԥшьгарақәеи рынагӡара ирзааҭгылеит.
Александр Ватаман иазгәеиҭеит Аофициалтә Хаҭарнакра аусураҿы аԥыжәара аманы ишаанхо ареспубликақәа русбарҭабжьаратә усеицура ацхраареи алахәреи. 2025 шықәса иаанарԥшит асеиԥш аусеицура онлаин еиԥыларақәа рформат алагьы ишыҟало, иара убасгьы Приднестровие ахаҭарнакцәа Аԥсныҟа раарала, ма Урыстәылатәи аган Аԥсни Приднестровиеи рҟынтәи аделегациақәа Москва, мамзаргьы Урыстәыла егьырҭ ақалақьқәа рахь инаԥхьаны имҩаԥнагар ауа аиԥыларақәа реиҿкаарала.
Иара убасгьы 2026 шықәсазы ԥхьаҟатәи аҿиара роуеит приднестровиатәи аган ақалақьқәа Бендеры Очамчыреи рышколхәыҷқәа ртематикатә еиԥыларақәеи агазеҭқәа «Приднестровиеи» «Аԥсни» наҟ-ааҟтәи реинырра хықәкыс иҟаҵаны Приднестровиеи Аԥсни рреспубликатә газеҭқәа рнапхгаҩцәа онлаин реиԥыларақәеи рымҩаԥгаразы иҟанаҵаз ажәалагалақәа.
Аԥсны 2026 шықәса ақыҭа иашықәсны иахьрылаҳәоу ҳасаб азуны, Аԥсни Приднестровиеи реинырраҿ ихазу хырхарҭаны сынтәа иҟалар алшоит приднестровиатәии аԥснытәии ақыҭақәа рнапхгаҩцәеи арҭ ақыҭақәа рҟынтәи аинтерес зҵоу ауааи ронлаин еиԥыларақәа.
Аиԥылараан, адипломатцәа 2025 шықәса аихшьаалақәа ҟарҵеит, ПМР Адәныҟатәи аусқәа рминистрреи ПМР иҟоу Аԥсны Аҳәынҭқарра Аофициалтә Хаҭарнакреи ԥхьаҟатәи русеицура апланқәа азгәарҭеит.
Аиԥылара ахыркәшамҭаз актуалтә зҵаарақәа рыспектр зегьы аҿы аусуратә еинырра адгылара аҭаразы еиқәшаҳаҭхеит.