2025 шықәса ажьырныҳәамза 15 рзы Боливариантәи Ареспублика Венесуела адәныҟатәи аусқәа Рминистрра ааԥхьарала, Венесуела иҟоу Аҷыдалкаатә Зинмчы змоу Аԥсны Аҳәынҭқарра ацҳаражәҳәаҩ Заур Ӷәаџьаа Аҳәынҭқарра Ахада Николас Мадуро Морос атәылахь есышықәса иҟаиҵо ааԥхьаратә уснагӡатә ихы алаирхәит.
Аныҳәатә еилатәара мҩаԥысит Каракас ақалақь аҿы иҟоу Тереза Каррено лыхьӡ зху атеатр аҿы.
Венесуела ажәлари адунеизегьтәи ауаажәларреи рахь есышықәса Николас Мадуро иҟаиҵо анашьҭымҭаҿы Аҳәынҭқарра Ахада 2024 шықәсазы атәыла аполитикатә, аекономикатә, егьырҭ аусхкқәа рҿы иҟанаҵаз аихьӡарақәеи аиҭакрақәеи ртәы далацәажәеит. Уи иазгәеиҭеит аа-шықәса инеиԥынкыланы аҭынчра иагаранту атәыла ажәлар рымчхара, насгьы Боливариантәи ареволиуциа аԥырхагахаразы жәларбжьаратәи афашизм имҩаԥнагоз аҽазышәарақәа рҿаԥхьа аиааира агара.
Аусмҩаԥгатә рхы аладырхәит, ҷыдала, аҳәынҭқарратә усбарҭақәа, иреиҳау арратә еиҳабыра, Венесуела аккредитациа змоу адипломаттә корпус рхаҭарнакцәа.
Ацеремониа ахыркәшамҭаз, Аҳәынҭқарра Ахада адипломатиатә корпус абзиараз ҳәа анреиҳәоз, Аԥсны ацҳаражәҳәаҩ Заур Ӷәаџьаа Аҳәынҭқарра Ахада Николас Мадуро инапы имхуа, Аԥсны Аҳәынҭқарра анапхгара рҟынтәи аиашьаратә салам ииҭеит.

