2025 шықәса ԥхынгәы 7 азы Боливариантәи Ареспублика Венесуела иҟоу аҷыдалкаатә зинмчы змоу Аԥсны Аҳәынҭқарра ацҳаражәҳәаҩ Заур Ӷәаџьаа, Венесуела иҟоу аҷыдалкаатә зинмчы змоу ацҳаражәҳәаҩ Андреи Молчан инаԥхьарала, Белоруссиа ахьыԥшымра Амш азгәаҭареи Белоруссиа аҵакырадгьыл анацисттә мпыҵахалаҩцәа рҟынтәи ахақәиҭтәра 81 шықәса ахыҵра азгәаҭареи ирызкыз ауснагӡатә ихы алаирхәит.
Аусмҩаԥгатә мҩаԥысит Каракас ақалақь аҿы иҟоу Амилаҭтә Пантеон "Симон Боливар имавзолеи" аҿы.
Аофициалтә усмҩаԥгатә Венесуела адәныҟатәи аусқәа рминистр Иван Хили, Венесуела иҟоу аҷыдалкаатә зинмчы змоу Белоруссиа ацҳаражәҳәаҩ Андреи Молчани, Европеи Аҩадатәи Америкеи русқәа рминистр ихаҭыԥуаҩ Андреа Кораои рхантәаҩрала имҩаԥысит.
Белоруссиа Ахьыԥшымра Амши атәыла анацисттә мпыҵахалаҩцәа рҟынтәи ахақәиҭтәреи азгәарҭоит ԥхынгәы 3 азы – 1944 шықәсазы Асовет ари Белоруссиатәи апартизанцәеи Минск ианалалаз амш аҽны.
Аусмҩаԥгатә рхы аладырхәит Венесуела аккредитациа змоу ацҳаражәҳәаҩцәеи адипломатиатә миссиақәа рнапхгаҩцәеи, Венесуела адәныҟатәи аусқәа рминистрреи аинформациатә хархәагақәеи рхаҭарнакцәеи, егьырҭ асасцәеи.
