2025 шықәса цәыббрамза 29 рзы Боливариантәи Ареспублика Венесуела адәныҟатәи аусқәа рминистрра анаԥхьарала, Боливариантәи Ареспублика Венесуела иҟоу Аԥсны Аҳәынҭқарра ацҳаражәҳәаҩ Заур Ӷәаџьаа, Аҳәынҭқарратә суверенитети аҭынчреи рзы амилаҭтә Хеилак амаӡаныҟәгаҩ Хорхе Родригес инапхгарала имҩаԥысуаз аиԥылара ихы алаирхәит.
Хорхе Родригес иқәгылараҿы инаҵшьны иазгәеиҭеит, амилаҭтә Хеилак ахықәкы хада атәылаҿы аҭынчра ахьчаразы амчқәа реидкылара шакәу.
Аиԥылараҿы иара убасгьы дықәгыланы дцәажәеит атәыла ахада ихаҭыԥуаҩ Делси Родригесгьы. Лара ирылалҳәеит, аҳәынҭқарра ахада Николас Мадуро Америка бџьаршьҭыхла атәыла иажәлар, атәылаҿы аҷыдалкаатә ҭагылазаашьа алаҳәара азы аусԥҟа инапы шаҵаиҩыз.
«Аҷыдалкаатә ҭагылазаашьазы аусԥҟа ҳреспублика аҵакыратә акзаара ахьчареи, асуверенитети, ахьыԥшымреи, ихадоу астратегиатә интересқәеи рыхьчара иазырхоуп», ҳәа азгәеиҭеит Родригес. Лара илҳәеит, ари адокумент иаразнак амчра аиуеит, "Америкатәи аштатқәа бџьаршьҭыхла Венесуела ақәылара рҽазыршәар" ҳәа.
Аиԥылара рхы аладырхәит Венесуела аккредитациа змоу ацҳаражәҳәаҩцәеи адипломаттә миссиақәа рнаԥхгаҩцәеи, Амилаҭтә алхратә хеилак (CNE) аҿы ашәҟәы иҭагалоу 56 политикатә партиа рҟынтәи 54 рхаҭарнакцәа, аҳәынҭқарра аиҳабыреи акьыԥхьтә усбарҭақәеи рхаҭарнакцәа.
