Аԥсны адәныҟатәи аусқәа Рминистрра аҿы Кавказнҭыҵ ашәарҭадареи аҭышәынтәалареи рзы Жәларбжьаратәи Женеватәи аиҿцәажәарақәа рыцхантәаҩцәа: Еиду Амилаҭқәа Реиҿкаара аҟынтәи - Џьихан Султаноглу, Европатәи атәылақәа Реидгыла аҟынтәи - Магдален Гроно, иара убас Европатәи атәылақәа Реидгыла Ашәарҭадара Аиҿкаара аҟынтәи - Кристоф Ернст Спати.
Аԥсны аганахьала аиԥылара рхы аладырхәит адәныҟатәи аусқәа рминистр ихаҭыԥуаҩ Одиссеи Бигәаа, Аҩныҵҟатәи аусқәа Рминистрра аусзуҩцәа Лаша Аҩӡбеи Артур Гагәылиеи.
Одиссеи Бигәаа иҳәеит аиԥылара шымҩаԥысуа Аԥсны ахада иалхра аламҭалазы, иазгәеиҭеит атәылауаа Аԥсны ахьыԥшымра арӷәӷәара хықәкны ишрымоу иара убасгьы Аԥсны ашәарҭадара гарантс иамоу Урыстәылатәи Афедерациеи иареи реизыҟазаашьақәа еиҳагьы арҿиара шрыгәҭаку.
Аиԥылара алахәылацәа имҩаԥысран иҟоу Кавказнҭыҵ ашәарҭадареи аҭышәынтәалареи рзы Жәларбжьаратәи Женеватәи аиҿцәажәарақәа а-63-тәи араунд амшхәаԥштә зҵаарақәа пунк-цыԥхьаӡа ирзааҭгылеит.
Еиуеиԥшм актуалра злоу атемақәа шьҭыхын. Аԥсуа ган инаҵшьны ирҳәеит Қырҭтәылеи Аԥсни рыбжьара амч ахамырхәаразы аиқәшаҳаҭра анапаҵаҩрахадара злоу аҵакы шамоу.
Аганқәа ҷыдала ахшыҩзышьҭра арҭеит Гал аидысларақәа рызхьаԥшреи раԥырҟәҟәаареи рзы амеханизм (МПРИ) арҿыцреи рызҵаара. Аганқәа ргәаанагарақәа еибырҳәеит.
Жәларбжьаратәи аиҿцәажәарақәа анаҩстәи 63-тәи рраунд амҩаԥгара азыԥхьагәаҭоуп 2025 шықәса хәажәкырамза актәи азыбжазы.
