Ҳазҭоу ашықәс мшаԥы ҩба аҽны Аԥсны Аҳәынҭқарра ахада Бадра Зураб-иԥа Гәынба имаҵураҭыԥ аанкылара ацеремониа мҩаԥысит.
Уи рхы аладырхәит аҳәынҭқарра азакәанԥҵаратә, анагӡаратә, аӡбаратә усбарҭақәа рхаҭарнакцәа, Ацентртә алхратә комиссиа алахәылацәа, Урыстәылатәи Афедерациа, Аахыҵ Уаԥстәылатәи Ареспублика, Боливариантәи Ареспублика Венесуела, Никарагуатәи Ареспублика, Приднестровиантәи Ареспублика рҟынтәи аҳаҭыр зқәу асасцәа.
Ахада иалхра аныҳәатә церемониа ааиртит Жәлар Реизара-Апарламент аиҳабы Лаша Ашәба.
Аԥсны ахадас иалырхыз Бадра Гәынба ареспублика Аконституциа инапы ақәҵаны аԥсуа бызшәала ҭоуба иуит ижәлар рҿаҧхьа. Абри ашьҭахь аҳәынҭқарра ахада инапы иадыркит аҳәынҭқарратә герб асахьеи "Аԥсны Аҳәынҭқарра Ахада" ҳәа аҩыреи зну амҳәыр, аштандарт, аҳәынҭқарра ахада Арбџьармчқәа рыдҵаҟаҵаҩ хада иаҳасабала инаигӡо ароль аазырԥшуа аҳәа, аԥсуа лабашьа.