Иахьа, жьҭаара 11 рзы Австриатәи Ареспублика аофициалтә еилазаарақәа ашәҟәы иҭаргалеит Австриа-Аԥсны реиҿкаара.

Аиҿкаара аԥҵара иахықәкны иҟоуп Аԥсны Аҳәынҭқарреи Австриатәи Ареспубликеи рыбжьара акультуратәи агуманитартәи усхк аҟны русеицуратә еизыҟазаашьақәа рырҿиара арҭбаара, иара убасгьы Аԥсны иазку аинформациа – аҭоурых, акультура, аҵарадырра, атуризм уҳәа егьырҭ аусхкқәа рганахь ала иобиективтәу аинформациа амҩаԥгара.

Хара имгакәа иазыԥхьагәаҭоуп Аԥсны-Австриатә еиҿкаара ахаҭарнакцәа Аԥсны Аҳәынҭқаррахь раара, ареспублика еиуеиԥшым аминистррақәеи аусбарҭақәеи рҿы аиԥыларақәа.