Жьҭаара 10-11 2017 шықәса рзы Женева имҩаԥысит Аахыҵ Кавказ ашәарҭадареи аҭынчреи рзы Женеватәи аиҿцәажәарақәа 41 рраунд.
Аԥснытәи аделегациа напхгара аиҭеит Аԥсны Адәныҟатәи аусқәа рминистр Даур Ақаҩба. Аделегациа иалахәын: Аԥсны Адәныҟатәи аусқәа рминистр ицхырааҩ Иракли Ҭыжәба, Аԥсны Адәныҟатәи аусқәа рминистрреи жәларбжьаратәи аиҿкаарақәеи реимадараз Адепартамент аиҳабы Артур Гагәылиеи, Аԥсны Адәныҟатәи аусқәа рминистрра Аконсултә Департамент аиҳабы ихаҭыԥуаҩ Лаша Аҩӡбеи.

41-тәи Женеватәи аиҿцәажәарақәа рраунд аҟны традициала иҷыдоу азхьаԥшра аҭан амч ахамырхәаразы аҳәамҭа аицыҟаҵара азҵаара. Женеватәи аиҿцәажәарақәа ирхықәкы хаданы иҟоу абри аҩыза аҳәамҭа шьаҿа бзианы иҟалон Аԥсни Қырҭтәылеи Аԥсни Аахыҵ Уаԥстәылеи рыбжьара амч ахамырхәаразы аиқәшаҳаҭра анапаҵаҩраз, аха Аганқәа аҽазныкгьы абри адокумент аицнапаҵаҩра рзеиҿымкааит. Аганқәа иаздырхиеит аҳәамҭа атекст альтернативтә вариантқәа, уажәшьҭантәи аиԥылараан рылацәажәаразы.

Аиҿцәажәарақәа раан ирылацәажәан еиуеиԥшымыз, Аԥсны Аҳәынҭқарраз аҵакы зманы иҟаз азҵаарақәа. Хаҭала иазааҭгылан ареспубликаҿ аҭыԥ зауз аекологиатә ҭагылазаашьа уадаҩи уи зыхҟьаз амармалташьтә пты алаҵәареи. Даур Ақаҩба аҳәара ҟаиҵеит абри апроблема азхьаԥшра аҭахарц, иахәҭаны иҟоу адунеижәларбжьаратә цхыраара ҟаҵазарц.
Изаамҭанытәиу Аахыҵ Кавказ ашәарҭадареи аҭынчреи рзы Женеватәи аиҿцәажәарақәа 42 рраунд амҩаԥгара азыԥхьагәаҭоуп ԥхынҷкәын 12-13 2017 шықәса рзы.