Шьамтәылатәи Арабтә республикаҟны иҟоу Аԥсны Аҳәынҭқарра Ацҳаражәҳәарҭаҿы мшаԥы 25 рзы Шьамтәыла иҟоу Асултанат Оман азинмчы змоу ацҳаражәҳәаҩ Турки Бен Махмуд Аль-Бусаиди Шьамтәылатәи Арабтә республикаҟны иҟоу Аԥсны Аҳәынҭқарра азинмчра нагӡа змоу ацҳаражәҳәаҩ Баграт Хәытабеи еиԥылеит.
Аиԥылара иалахәын Шьамтәылатәи Арабтә республикаҿы иҟоу Аԥсны Ацҳаражәҳәарҭа аполитикатә зҵаарақәа рзы абжьгаҩ Мухаммад Али, адиаспора аус рыцуразы Ацҳаражәҳәарҭа абжьгаҩ Џьамбо Агрба, ацҳаражәҳәаҩ аштатнҭыҵтә цхырааҩс имоу Кутаиба Ҳасан.
Шьамтәыла иҟоу Асултанат Оман азинмчы змоу ацҳаражәҳәаҩ Турки Бен Махмуд Аль-Бусаиди Шьамтәылатәи Арабтә республикаҟны иҟоу Аԥсны Аҳәынҭқарра азинмчра нагӡа змоу ацҳаражәҳәаҩ Баграт Хәытаба идиныҳәалеит Шьамтәыла Аԥсны Ацҳаражәҳәарҭа аартра, Аԥсны ажәлар ирзеиӷьеишьеит аҭынчреи ашәҭыкакаҷреи.
Аԥсны Аҳәынҭқарра азинмчра нагӡа змоу ацҳаражәҳәаҩ Баграт Хәытаба Аль-Бусаиди аиԥылара амҩаԥысразы ҭабуп ҳәа иеиҳәеит.
Аиԥылара ахыркәшамҭаз аганқәа агәаларшәагатә ҳамҭақәа еимырдеит.