Ажьырныҳәа 15 рзы Аԥсны иҟоу Урыстәыла ацҳаражәҳәаҩ Алексеи Двинианин Аԥсны адәныҟатәи аусқәа рминистр инапынҵақәа назыгӡо Даур Ақаҩба диирдырит Аԥсны иҟоу Урыстәыла Ацҳаражәҳәарҭа абжьгаҩ ҿыц - Максим Литвинов.
Даур Ақаҩба уи аԥсшәа иаҳәо иазгәеиҭеит Аԥсны адәныҟатәи аусқәа рминистрреи Аԥсны иҟоу Урыстәыла Ацҳаражәҳәарҭеи аиҩызаратә еизыҟазаашьа бзиақәа шрымоу.
«Максим Вадим-иԥеи сареи ҳаибадыруеижьҭеи акыр ҵуеит, раԥхьа иргыланы Женеватәи аиҿцәажәарақәа рыла. Уи иаҳнаҭоит алшара ԥхьаҟагьы ҳаицусура хра аманы ишыҟало» ҳәа иҳәеит аминистр.
Аԥсны иҟоу Урыстәыла ацҳаражәҳәаҩ Алексеи Двинианин Аԥсны адәныҟатәи аусқәа рминистрра анапхгара ҭабуп ҳәа реиҳәеит Ацҳаражәҳәарҭахь иаадырԥшуа агәаартразы.
Двинианин иазгәеиҭеит атәылаҿ иҟоу аҭагылазаашьа агәҭынчымра шинаҭо аха убри аан уи атәылаҩныҵҟатә ус акәны дшахәаԥшуа.
«Ареспубликаҿы аҭынчреи ашәарҭадареи реиқәырхара хра аманы ҳахәаԥшуеит, Урыстәыла аганахь ала иарбанызаалак ацхыраара ҳақәшаҳаҭуп. Ҳадәныҟаполитикатә усеицура ԥхьаҟагьы аҿиара шамоу азы агәрагара ыҟоуп» ҳәа иҳәеит иара.
