Ҳазҭоу ашықәс мшаԥы 16 азы Приднестровиа Молдавиатәи Ареспубликаҿы Аԥсны Аҳәынҭқарра ахаҭарнак Александр Ватаман 1941-1945 шықәсақәа рзы Аџьынџьтәылатә еибашьра Дуӡӡа иалахәыз, 1944 шықәсазы дҭахеит ҳәа агәаанагара ззыҟоу идырым асолдаҭ иԥсыбаҩ анышә аҭара иазку аусмҩаԥгатә ихы алаирхәит.
Арратә ҳаҭырқәҵарала имҩаԥгаз аԥсыжра рхы аладырхәит Приднестровие ахада Вадим Красносельски, аррамаҵзурауаа, ауаажәларратә усзуҩцәа.

Агазеҭ «Днестровскаиа Правда» ажурналист изҵаара аҭак ҟаҵо, Александр Ватаман иазгәеиҭеит: «Сара иахьа арахь сааиит аҭоурыхтә ҵабырг агәалашәара ҳаҭыр ақәҵаразы, аибашьраҟынтәи ихнымҳәызи аибашьра ашьҭахь зыԥсҭазаара иалҵыз аветеранцәеи ргәалашәара аҳаҭыр азы ашәҭшьыҵәрақәа шьҭасҵарц, рҿаԥхьа схы ласырҟәырц. Иахьа имҩаԥысыз аусмҩаԥгатә даара аҵак ду змоу усуп. Аџьынџьтәылатә еибашьра Дуӡӡа ашықәсқәа ирыдҳәалоу ахҭысқәа, Аиааира Дуӡӡа аҭоурых иахьа, ҩынтәны аҵак ду амоуп, атәылақәа жәпакы рҿы афашизм иаиааиз рыӡбахәқәа анеицаркуа, аҭоурых ҿыц анырыҩуа аамҭазы.

Урыстәылатәи Афедерациаҿы, Аԥсны Аҳәынҭқарраҿы, Приднестровие Молдавиатәи Ареспубликаҿы аҭоурых еиқәдырхоит, анацизм иаиааиз ргәалашәара ииашаны иазыҟоуп. Аԥсадгьыл ахақәиҭтәразы СССР ажәларқәа зегьы еивагыланы агәырҩеи, агәаҟреи, аԥсреи еицны ирхысит, ииашаҵәҟьаны Аиааира Дуӡӡагьы ргеит».