Рашәарамза 11 рзы Аԥсны Аҳәынҭқарра адәныҟатәи аусқәа рминистр Олег Барцыц Аԥснытәи аҳәынҭқарратә университет (ААУ) аҿы астол гьежь «Аахыҵ Кавкази Амшынеиқәатә регион маҷи рҿы агеополитикатә процессқәа: аҭоурыхи иахьатәи аамҭеи» аҿы дықәгылеит.
Ауснагӡатә иалахәын аҳәынҭқарратә мчра аусбарҭақәа рхаҭарнакцәа, Жәлар Реизара-Апарламент адепутатцәа, аҭҵаарадырратәи аексперттәи еилазаара, ауаажәларратә еиҿкаарақәа рхаҭарнакцәа, иара убас 7-тәи урыстәылатәи арратә база аррамаҵзурауаа, ААУ апрофессор-рҵаҩратә еилазаара.
Аимак-аиҿак амҩаԥгараан ирзааҭгылан Аахыҵ Кавкази Амшынеиқәатә регион маҷи рҿы ҳаамҭазтәи агеополитикатә процессқәа ирыдҳәалоу арегионалтәи жәларбжьаратәи мшхәаԥштәқәа рактуалтә зҵаарақәа.
Олег Барцыц иқәгылараҿы инарҭбааны далацәажәеит уажәтәи жәларбжьаратәии арегионалтәии ҭагылазаашьа атәы, иазгәеиҭеит аглобалтә геополитикатә процессқәа арегион аҿы иҟоу аҭагылазаашьа ишаныруа.
Адәныҟатәи аусқәа рминистр ҷыдала дырзааҭгылеит Кавказнҭыҵ ашәарҭадареи аҭышәынтәалареи рзы Жәларбжьаратәи аиҿцәажәарақәа, иазгәеиҭеит Қырҭтәыла адеструктивтә позициа
Иара инаҵшьны иазгәеиҭеит Аԥсны Аҳәынҭқарреи Қырҭтәылатәи Ареспубликеи рыбжьара амч ахамырхәаразы зиншьаҭала адҵа ҟазҵо аиқәшаҳаҭра анапаҵаҩра, узықәгәыӷша жәларбжьаратәи ашәарҭадаратә гарантиақәа раԥҵара иадгыло Аԥсны аҳәынҭқарра зҽызымԥсахуа апозициа.
Олег Барцыц иазгәеиҭеит аиҿцәажәарақәа рформат алҵра алҵшәа унаҭом ҳәа. «Уи иаанагало акоуп: аформат ҳара ҳада иацҵахоит, арегион аҿы ҳапроблемақәеи ҳҭагылазаашьақәеи ирылацәажәалоит, аха ари аформат аҿы ҳажәа раҳашам» - иҳәеит иара.
Урыстәылатәи Афедерациеи Аԥсны Аҳәынҭқарреи реизыҟазаашьақәа рыҿиара далацәажәо Олег Барцыц инаҵшьны иазгәеиҭеит Урыстәыла Аԥсны ихадоу стратегиатә дгылаҩны, партниорны ишыҟоу, уи аус ацура иаҵанакуеит ахырхарҭақәа жәпакы – еишьаршәалоу адәныҟатәи аполитика, ашәарҭадара аиҿкаара, асоциал-економикатә ҿиара, агуманитартә усеицура, аҵара, агәабзиарахьчара, акультуратә еимадарақәа налаҵаны.
Аминистр далацәажәеит Шьамтәылатәи Арабтә Республикеи, Боливариантәи Ареспублика Венесуелеи, Ареспублика Никарагуеи Аԥсни реизыҟазаашьақәа рырӷәӷәара иазырхоу Мрагылара Ааигәатәи Латиноамерикатәи ахырхарҭақәа рҟны аминистрра аусура атәы, Алада-Мрагыларатәи Азиеи Африкатәи аконтиненти рҿы аимадарақәа рырҭбааразы аусура атәы.
Астол гьежь алахәылацәа иазгәарҭеит аҭҵаарадырра-аналитикатә усеицура ԥхьаҟатәи аҿиареи жәларбжьаратәи аизыҟазаашьақәеи, арегионалтә шәарҭадареи, ҳаамҭазтәи агеополитикатә тенденциақәеи рызҵаарақәа рзы аексперттә гәаанагарақәа реимдараацҵара аҵакы.
