Приднестровиатәи Молдавиатәи Ареспублика адәныҟатәи аусқәа рминистрраҿы ареспублика адәныҟатәи аусқәа рминистр ихаҭыԥуаҩ Александр Стециуки Аԥсны Аҳәынҭқарра ахаҭарнак Александр Ватамани реиԥылара мҩаԥысит.

Аиԥылара аусуратә ҟазшьа аман, уи аҳәаақәа ирҭагӡаны А.Ватамани А.Стециуки ркомпетенциақәа рҳәаақәа ирҭагӡаны, ПМР аҿы Аԥсны Аҳәынҭқарра Аофициалтә Хаҭарнакра аусура аиқәыршәара иадҳәалоу апрактикатә зҵаарақәа ирылацәажәеит.

Аиԥылараҿы дара Приднестровиатәи Молдавиатәи Ареспублика адәныҟатәи аусқәа рминистрреи Приднестровие иҟоу Аԥсны Аҳәынҭқарра Аофициалтә Хаҭарнакреи реимадара ҳаамҭазтәи аспектқәа рзы ргәаанагарақәа еимырдеит.

Аиԥылара хыркәшо аганқәа анаҩстәи аимадарақәа ишырзыхиоу шьақәдырӷәӷәеит, насгьы ицәырҵыр зылшо азҵаарақәа зегьы рзы аусуратә еимадара ацҵаразы еиқәшаҳаҭхеит.