Ԥхынгәымза 21 рзы, Аԥсны Аҳәынҭқарра аделегациа Никарагуа аофициалтә визитла рыҟазаара аҳәаақәа ирҭагӡаны, Аԥсны Аҳәынҭқарра адәныҟатәи аусқәа рминистр Олег Барцыци Ареспублика Никарагуа адәныҟатәи аусқәа рминистр Вальдрак Џьентскеи реиԥылара мҩаԥысит.
Аԥснытәи аган аҟынтәи аиԥылара рхы аладырхәит: Аԥсны Аҳәынҭқарра адәныҟатәи аусқәа рминистр ихаҭыԥуаҩ инапынҵақәа назыгӡо Иракли Ҭыжәба, Аԥсны адәныҟатәи аусқәа рминистрра Латинтәи Америка, Азиа, Азиа-Аокеанҭынч ррегион Адепартамент анапхгаҩы Мадина Зыхәба, Ареспублика Никарагуа иҟоу азинмчнагӡа змоу Аԥсны ацҳаражәҳәаҩ Инар Ладариа, Ацҳаражәҳәарҭа абжьгаҩ Алиас Аиба, Аԥсны абизнес еилазаара ахаҭарнакцәа Борис Барцыц, Симон Агрба, Алиас Ҳашба.
Иара убас, аиԥылара ихы алаирхәит Никарагуа адәныҟатәи аусқәа рминистр ихаҭыԥуаҩ, аполитикатәи жәларбжьаратәи еизыҟазаашьақәа рзы Ареспублика Никарагуа ахада иабжьгаҩ Иван Лара.
Аиԥылараҿы аганқәа аԥсны-никарагуатәи ҩ-ганктәи аусеицура иадҳәалоу азҵаарақәа жәпакы ирылацәажәеит.
Аҳәынҭқаррақәа рыбжьаратәи аизыҟазаашьақәа рырӷәӷәареи аекономикеи, ахәаахәҭреи, акультуреи рҿы аимадара арҭбаареи рзы ҩ-ганктәи аинтерес аарԥшын.
Аминистр, ҷыдала, инаҵшьны иазгәеиҭеит: «Сара гәахәарыла иазгәасҭоит Аԥсны Аҳәынҭқарра абизнесеилазаара ахаҭарнакцәа иахьа ара иахьыҟоу. Ари аганахь ала Аԥсны аделегациа Никарагуа аҟазаара раԥхьа иргыланы уаанӡа ахәаахәҭра-економикатә усеицура аусхк аҟны анапы зҵаҩыз аиқәшаҳаҭрақәа апрактикаҿы рынагӡара иазырхоуп.
Уаанӡа аинвестициақәеи, ахәаахәҭреи, жәларбжьаратәи аусеицура аҿиарази аҳәынҭқарра ахада иабжьгаҩ, аҩыза Лауреано Ортега Мурильои ҳареи ҳаиԥылара мҩаԥыситт, уаҟа ахәаахәҭратәи афинанстәи еизыҟазаашьақәа рырҭбаара алшарақәа ҳрылацәажәеит».
Аиҿцәажәараан Олег Барцыц, еиуеиԥшым арегионалтәи адунеизегьтәи аусмҩаԥгатәқәа рҿы, ҷыдала Еиду Амилаҭқәа Реиҿкаара аҿы Ареспублика Никарагуа ҳтәыла иазыҟанаҵо адгылара аҵак ду шамоу инаҵшьны иазгәеиҭеит.
Аминистр иазгәеиҭеит Аԥсны Никарагуа зыгәра угартә иҟоу ҩызак, партниорк аҳасабала ишахәаԥшуа.
Олег Барцыц никарагуатәи иколлега иазирхиаз адкыларазы ҭабуп ҳәа иеиҳәеит, Аԥсни Никарагуеи ирыбжьоу аимабзиаратә еизыҟазаашьақәа аринахысгьы рыҿиара аҵак ду шамоу азгәеиҭеит.
Аҩганктәи аимадарақәа рырҭбаареи аҩаӡарақәа ҳаракқәа рҿы активла аиҿцәажәарақәа рымҩаԥгареи рзы атәылақәа рыҩбагьы агәазыҳәара шрымоу азгәаҭан.
Аиԥылара традициала иҟәандоу, аиҩызаратә ҭагылазаашьа аманы имҩаԥысит.
