1992-1993 шықәсқәа рзы Аԥсны жәлар рџьынџьтәылатә еибашьраҿы Аиааира агара 32 шықәса ахыҵра амш аҽны, Приднестровиатәи Молдавиатәи Ареспубликаҿ иҟоу Аԥсны Аҳәынҭқарра аофициалтә Хаҭарнакраҿы азинмчнагӡа змоу Аԥсны ахаҭарнак Александр Ватамани 1993 шықәса ааԥынразы Аԥсныҟа цхыраара иааз Сергеи Белинскии реиԥылара мҩаԥысит.

Асас бзиала шәаабеит ҳәа иаҳәо, Александр Ватаман иазгәеиҭеит: "Аԥсны ажәлар еснагь ргәалашәараҿы иаанхоит 1993 шықәса цәыббра 30 – Аиааира Амш ааигәахарц азы ацхыраара ҟазҵаз, хатәгәаԥхарала аибашьра амца иалагылаз зегьы. Хатәгәаԥхарала аԥсуа жәлар ирывагылаз иаадырԥшит аиашьаратә еицхыраара закәыҵәҟьоу. Шәара, ҳаҭыр зқәу Сергеи Николаи-иԥа, шәрылахәуп хшаҭара ҟамҵакәа аиаша иазықәԥоз жәпаҩыла Приднестровие ауааԥсыра" ҳәа.

Адипломат, Сергеи Белински аԥхьа днаргыланы, ҭабуп ҳәа реиҳәеит Приднестровиантәи хатәгәаԥхарала Аԥсны еиаҳа иуадаҩыз аамҭазы цхыраара инеиз, Аԥсни аԥсуа жәлари рзы абџьар кны иқәԥоз зегьы.
Аиԥылараҿы Сергеи Белински уи аамҭазтәи зегь реиҳа игәалашәараҿы иаанхаз ахҭысқәа дырзааҭгылеит.
Аԥсны Аҳәынҭқарра Арбџьармчқәа ркомандаҟаҵаҩ хада Владислав Арӡынба Сергеи Николаи-иԥа Белински Тамышьтәи аоперациа дахьалахәыз азы ҭабуп ҳәа иаҳәаны, ианеишьеит амедалқәа "Агәымшәараз". Белински иара убасгьы ианашьоуп амедал "Аиааираз".