Лаҵара 8 азы Боливариантәи Ареспублика Венесуела иҟоу Аԥсны Аҳәынҭқарра Ацҳаражәҳәаҩ Заур Ӷәаџьаа, Боливариантәи Ареспублика Венесуела иҟоу Урыстәылатәи Афедерациа аусқәа рзы аамҭалатә Гәрага Едуард Соколов инаԥхьарала Аџьынџьтәылатә еибашьра Дуӡӡаҿы Аиааира агара 80 шықәса ахыҵра иазкны Венесуела имҩаԥысуаз аныҳәатә усмҩаԥгатәқәа ихы рылаирхәит.
Адныҳәаларатә ажәахә ҟаиҵеит Урыстәылатәи Афедерациа аусқәа рзы аамҭалатә Гәрага Едуард Соколов.
Аусмҩаԥгатә аҳәаақәа ирҭагӡаны Ацҳаражәҳәаҩ Заур Ӷәаџьаа Ацҳаражәҳәарҭа аусзуҩцәа агәалашәаратә рыцхә рыдиныҳәалеит.
Аусмҩаԥгатә рхы аладырхәит Венесуела аккредитациа змоу ацҳаражәҳәаҩцәеи адипломатиатә миссиақәа рнапхгаҩцәеи, Венесуела адәныҟатәи аусқәа рминистрра ахаҭарнакцәеи егьырҭ асасцәеи.
Лаҵара 7 азы Венесуела иҟоу Аԥсны ацҳаражәҳәаҩ Заур Ӷәаџьаа, Венесуела иҟоу Урыстәыла Ацҳаражәҳәарҭа ааԥхьарала, 1941-1945 шықәсқәа рзтәи Аџьынџьтәылатә еибашьра Дуӡӡаҿы Аиааира агара 80 шықәса ахыҵра иазкыз ацеремониа ихы алаирхәит.
Венесуела Амилаҭтә Пантеон аҿы имҩаԥысуаз ацеремониа рхы аладырхәит: Венесуела иҟоу Урыстәылатәи Афедерациа аусқәа рзы аамҭалатә Гәрага Едуард Соколов, Адәныҟатәи ахәаахәҭреи Жәларбжьаратәи аинвестициақәеи рминистр Коромото Годои, атуризм аминистр Летисиа Гомес, Амилаҭтә Еизара адепутатцәа Хесус Фариа, Венсуела иҟоу аккредитациа змоу адипломатиатә корпусқәа рхаҭарнакцәа.
Аусмҩаԥгатә ахыркәшамҭазы Жәлар рфронт ахаҭарнакцәа, Каракас иҟоу Урыстәылатәи Ацҳаражәҳәарҭеи Урыстәылатәи Аҩни рыцхыраарала, идырым асолдаҭ иҳаҭгәын аҟынтәи иаагаз амцабз ахәҭаҷқәа зҭоу алашарбага Венесуелаҟа инаргеит. Амилаҭтә Пантеон аҭаларҭа хадаҿы ацәашьқәа адыркит.
