Ирантәи ақалақь Ахваз аҿы аҭыԥ змаз атеррористтә акт инадҳәаланы Аԥсны адәныҟатәи аусқәа рминистрра адышшыларатә шәҟәы нанашьҭит Аислам Республика Иран Адәныҟатәи аусқәа рминистррахь.

Адышшыларатә шәҟәы аҿы иҳәоуп:

«Аԥсны Аҳәынҭқарраҿ гәалсра дула ирыдыркылеит цәыббра 22 рзы арратә парад амҩаԥгараан Ирантәи ақалақь Ахваз аҿы аҭыԥ змаз атеррористтә акт аӡбахә. Аԥсны адәныҟатәи аусқәа рминистрра гәалсрыла ирыдышшылоит иҭахаз рыуацәеи рҭынхацәеи. Шәгәырҩа шәыцеиҩаҳшоит» ҳәа.