Аԥсны Адәныҟатәи аусқәа рминистр Олег Барцыц Приднестровиатәи Молдавиатәи Ареспублика Адәныҟатәи аусқәа рминистр Витали Игнатиев имшира идиныҳәалеит.
Адныҳәалараҿы иазгәаҭоуп:
"Приднестровиатәи Молдавиатәи Ареспублика Адәныҟатәи аусқәа рминистрра ахадараҿы шықәсырацәалатәи шәусура аҳәынҭқарра аинтересқәа гәык-ԥсыкала рымаҵ аура иаҿырԥшыгоуп. Шәара шәнапхгарала приднестровиатәи адипломатиатә маҵзура ареспублика амилаҭтә интересқәа ӷәӷәала ирыдгылоит ииашаҵәҟьаны имариам агеополитикатә ҭагылазаашьақәа раан, убри аан аконструктивтә знеишьеи адиалог ахь агәаартреи еиқәырханы.
Ҷыдала иазгәасҭар сҭахын Аԥсны Аҳәынҭқарреи Приднестровиатәи Молдавиатәи Ареспубликеи рыбжьара аиҩызаратә еизыҟазаашьақәа рыҿиареи рырӷәӷәареи рзы шәусура ду. Шәзанааҭтәи шәхатә ҟазшьақәеи ирыбзоураны адәныҟаполитикатә усбарҭақәа рыбжьара аиашьареи аидгылареи идоуҳатәу реинырра аҩаӡара ҳаракы ааннакылоит.
Агәра ганы сыҟоуп ҳҳәынҭқаррақәеи ҳадәныҟаполитикатә усбарҭақәеи рыбжьара аусеицура ԥхьаҟатәи аҿиара аринахысгьы Аԥсни Приднестровиеи рыжәларқәа ринтересқәа ишрықәшәо, иара убас традициала аиҩызаратә еимадарақәа рырӷәӷәара ишацхраауа».
Олег Барцыц Витали Игнатиев изеиӷьеишьеит агәабзиара, аманшәалара, аҭакзыԥхықәу аҳәынҭқарратә усураҿы ԥхьаҟагьы ақәҿиарақәа.