Аԥсны Адәныҟатәи аусқәа рминистрраҟны имҩаԥысит Аԥсны Адәныҟатәи аусқәа рминистр Сергеи Шамбеи Приднестровиатәи Молдавиатәи ареспублика адәныҟатәи аусқәа рминистр ихаҭыԥуаҩ Александр Стециуки, Аԥсны иҟоу ПМР Аофициалтә Хаҭарнакра ахада Гарри Кәыпалбеи, ПМР АдәАР аҳәаанырцәтә усбарҭақәеи афинансқәеи русура Анапхгараҭара аиҳабы Ирина Мочановеи реиԥылара.
Аиԥылара иалахәын: Аԥсны Адәныҟатәи аусқәа рминистр ихаҭыԥуаҩ Иракли Ҭыжәба, Аԥсны Адәныҟатәи аусқәа рминистрра астратегиатә усеицуразы Адепартамент аиҳабы Џьемал Бганба.
Александр Стециук Приднестровиатәи Молдавиатәи ареспублика адәныҟатәи аусқәа рминистр Витали Игнатиев ихьӡала Сергеи Шамба Аԥсны Адәныҟатәи аусқәа рминистрс иҟалара идиныҳәалеит, изеиӷьеишьеит иусураҟны ақәҿиарақәа.
Сергеи Шамба иазгәеиҭеит аԥсуа-приднестровиатәи аиҩызаратә еизыҟазаашьақәа рҵакы, иҳәеит анаҩсгьы ҩ-ганктәи аинырра аизырҳара дшазхиоу.
Иара убасгьы дара алацәажәеит аҳәынҭқаррабжьаратә усеицура азҵаатәқәа, Аԥсны Аҳәынҭқарреи Приднестровиа Молдавиатәи Ареспубликеи реизыҟазаашьақәа рырҿиара.
