Хәажәкырамза 7, 2008 шықәса рзы Аҟәа ақалақь аҿы Аԥсны Аҳәынҭқарра ахада Сергеи Уасил-иԥа Багаԥшь «Приднестровтәи Молдавтәи Ареспубликаҿы Аԥсны Аҳәынҭқарра аофициалтә Хаҭарнакра аԥҵаразы» Аусԥҟа инапы аҵаиҩит.
Иарбоу аусшәҟәы анапаҵыҩра Аԥсны Аҳәынҭқарреи Приднестровтәи Молдавтәи Ареспубликеи рҳәынҭқаррабжьаратә еизыҟазаашьақәа рҿы иалкаау, акырӡа зҵазкуа хҭысны иҟалеит.
Аофициалтә Хаҭарнакра аусура азырхоуп аҵареи, аҿартә политикеи, аспорти, акультуреи рганахь ала Аԥсни Приднестровиеи ҩ-ганктәи реимадарақәа рырҿиара. Аофициалтә Хаҭарнакра акомпетенциа аҳәаақәа ирҭагӡаны аусбарҭабжьаратә еиқәшаҳаҭрақәа рҳәаа иҭагӡаны имҩаԥысуа аусура иалахәуп. Арҭ аиқәшаҳаҭрақәа ирыҵаркуеит аекономикатәи, агуманитартәи, асоциалтәи усхкқәа рҿы иактуалтәу ахықәкқәеи ахыдҵақәеи жәпакы.
Ахаҭарнакра иадҵоуп еицрыдыркылахьоу аконсултә функциақәа рыхәҭак анагӡара, Аԥсны Аҳәынҭқарреи уи атәылауааи рзинқәеи ринтересқәеи рыхьчара, Аԥсны Аҳәынҭқарра адәныҟатәии аҩныҵҟатәии аполитиказы аофициалтә информациа аларҵәара.
