Аԥсны адәныҟатәи аусқәа рминистр Инал Арӡынба Приднестровиатәи Молдавиатәи Ареспублика адәныҟатәи аусқәа рминистр Витали Игнатьев Адәныҟатәи аусқәа рминистрс иеиҭаҟалараз адныҳәаларатә шәҟәы изишьҭит.

Адныҳәаларатә шәҟәаҿы иарбоуп:

«Ҳаҭыр ду шшәықәысҵо азгәаҭо гәыкала ишәыдысныҳәалоит Приднестровиатәи Молдавиатәи Ареспублика адәныҟатәи аусқәа рминистрс шәыҟалара.

Ари амаҵзура шәеиҭахагылара иаанарԥшуеит имҩаԥыжәго аусура ахәшьара ҳарак шамоу, атәыла анапхгара пату шақәырҵо.

Шәара шәнапхгарала аминистрра жәларбжьаратәи аренаҿы ареспублика ахьӡ-аԥша ҳаранакуеит, амилаҭтә интересқәа ахьчоит. Агәра згоит шәыпрофессионализм, шәҟазара ҳарак, шәԥышәа ду ԥхьаҟагьы Приднестровиатәи Молдавиатәи Ареспублика иқәынхо ажәлар рымаҵ аура ишазырхахо.»