Аԥсны Аҳәынҭқарра адәныҟатәи аусқәа рминистрра Аахыҵ Уаԥстәыла адәныҟатәи аусқәа рминистрра Аахыҵ Уаԥстәылатәи Ареспублика ахьыԥшымраз Акт рыдыркылеижьҭеи 33 шықәса аҵра инамаданы адныҳәаларатә шәҟәы азырышьҭит

Адныҳәалараҿы иазгәаҭоуп:

"Ари аусшәҟәы аҳәынҭқарра закәантә шьаҭаны иазыҟалеит, ажәлар рхалаӡбареи рзинқәа рыхьчареи ирзаадырԥшуа ргәазыҳәарақәа рышьақәырӷәӷәаразы.

Ҳара, иашьаратә жәларык рыҳасаб ала, ари арыцхә иамоу аҵакы ҷыдала иаҳныруеит. Аԥсни Аахыҵ Уаԥстәылеи, ахьыԥшымреи ахатәҳәаақәҵара азини рзы ақәԥараҿы еиԥшу аԥышәарақәа ирхысхьеит, еснагьгьы еидгылоит. Ҳреспубликақәа еицырзеиԥшу аҭоурыхтә лахьынҵа мацара адагьы, асуверенитет ахьчареи, жәларбжьаратәи азхаҵареи, адемократиатә ҳәынҭқаррақәа рыргылареи рзы иҵаулоу аилибакаара еиднакылоит.

Ҳара агәра ганы ҳаҟоуп, аҩганктәи аизыҟазаашьақәа рырҵаулара ҳтәылақәа реизҳазыӷьареи арегион аҿы аҭышәынтәалара арӷәӷәареи ишрыцхраауа”.