Лаҵара 20 азы, Москва усуратә ҟазшьала иҟазаара аҳәаақәа ирҭагӡаны, Аԥсны Аҳәынҭқарра адәныҟатәи аусқәа рминистр ихаҭыԥуаҩ инапынҵақәа назыгӡо О.М. Бигәаа Приднестровиатәи Молдавиатәи Ареспублика адәныҟатәи аусқәа рминистр ихаҭыԥуаҩ А.П. Стациук диԥылеит.

Аиԥылараан аганқәа алацәажәеит аҩганктәи аусеицура иахьатәи аамҭазтәи аҭагылазаашьақәа, Аԥсны Аҳәынҭқарреи Приднестровиатәи Молдавиатәи Ареспубликеи русеицура аринахысгьы аҿиара аҭара азҿлымҳара азаадырԥшит.

О.М. Бигәаа иазгәеиҭеит ҩ-ганктәи аизыҟазаашьақәа рҿы аҳәынҭқарратә усбарҭақәа рыбжьара аусеицура арӷәӷәареи арҵаулареи аҵак ду шрымоу.

Аиԥылара традициала аиҩызаратә ҭагылазаашьа аманы имҩаԥысит.