Асандинисттә револиуциа аиааира 46 шықәса ахыҵра иазку аныҳәатә усмҩаԥгатәқәа разгәаҭара иалахәхаразы, Ареспублика Никарагуа ахада Даниель Ортега инаԥхьарала, официалла атәыла иаҭааз, Аԥсны адәныҟатәи аусқәа рминистр Олег Барцыц напхгара зиҭо Аԥсны Аҳәынҭқарра аделегациа 2025 шықәса ԥхынгәымза 19 азы арҭ аусмҩаԥгатәқәа рхы рыладырхәит.
Аофициалтә усмҩаԥгатәқәа раан, Аԥсны адәныҟатәи аусқәа Рминистрра анапхгаҩы Олег Барцыц Аԥсны Аҳәынҭқарра ахада Бадра Гәынба иҟынтәи Ареспублика Никарагуа ахада Даниель Ортега адныҳәаларатә шәҟәы ииҭеит.
Адныҳәалараҿы, ҷыдала, иазгәаҭоуп:
Аԥсны Аҳәынҭқарра анапхгареи ажәлари рыхьӡала аиашьаратә салам шәысҭоит, акыр шықәсатәи адиктатуреи атираниеи рҵыхәтәа ԥызҵәаз Сандинисттәи Ареволиуциа аиааира агара 46 шықәса ахыҵра инамаданы. Аџьамыӷәацәгьа зыхганы зхьыԥшымра аазгаз, ахақәиҭреи аҿиареи рзы рзин ахьчара хымԥаданы изшьо Аԥсны ажәлар, гәык-ԥсык ала аиашьаратә Республика Никарагуа ауааԥсыра ари амилаҭтә ныҳәа иацу ргәырӷьара рыцеиҩыршоит! Аԥсны хашҭра ақәымкәа еснагь иргәаладыршәалоит Никарагуа ахада Хосе Даниель Ортега Сааведреи Никарагуа ажәлари иҟарҵаз аиашьаратә дгылара!
Иахьа Никарагуа зхы иақәиҭу, исуверентәу, идемократиатәу, аҭынчра бзиа избо тәылоуп. Адәныҟатәи ақәыӷәӷәарақәа рыҟазаара иахьмырԥшыкәа, Ареспублика Никарагуа жәларбжьаратәи аренаҿы атәыла амилаҭтә интересқәа активла иахьчоит, насгьы арегионалтә мшхәаԥштә аҿы иҟоу ихымԥадатәиу азҵаарақәа рыӡбараҿы акыр зҵазкуа аконструктивтә роль нанагӡоит.
Ҳаҭыр зқәу, акомендант Хосе Даниель Ортега Сааведра, Аԥсны еиԥш адунеи зегьы аҿы шәара шәеицырдыруеит, ҳаҭыргьы шәықәуп агәымшәара злоу, апринципқәа ирықәныҟәоу ҳәынҭқарратә усзуҩык иҳасаб ала. Никарагуа аҳәынҭқарратә ҭагылазаашьеи, асоциал-економикатә ҿиареи, атәыла жәларбжьаратәи апозициақәеи рырӷәӷәараҿы шәара хаҭалатәи шәлагала ахә ашьара уадаҩуп.
Сара агәрагара ду сымоуп, Ареспублика Никарагуа ахада иҳасаб ала шәҭоурыхтә миссиа Латинтәи Америка арегион зегьы аҭышәынтәаларазы даара акыр шаҵанакуа.
Иахьа, Аԥсны Аҳәынҭқарра аделегациа Никарагуа инеиит, Никарагуатәи аиашьаратә жәлари урҭ раԥхьагылаҩцәа дуқәа акомендант Хосе Даниель Ортега Сааведреи ахада ицхырааҩ Росарио Мурильо Самбранеи ҳареи ҳаиҩызара даҽазныкгьы ашьақәырӷәӷәаразы.
Нагӡара ақәзааит Ареспублика Никарагуа! Нагӡара ақәзааит Аԥсни Никарагуеи рыжәларқәеи рҳәынҭқаррақәеи ирыбжьоу ԥыргара зқәым аиашьареи аидгылареи!»
Даниель Ортега, иара иганахь ала, иазгәеиҭеит: «Сшәыҳәоит, Аԥсны Аҳәынҭқарра ахадеи Аԥсны ажәлар фырхаҵеи сысалами иреиӷьӡоу сзеиӷьашьарақәеи рышәҭарц» ҳәа.
