Олег Барцыц ихы алаирхәит 1941-1945 шықәсқәа рзтәи Аџьынџьтәылатә еибашьра Ду аан анацистцәеи урҭ рыцхырааҩцәеи асовет жәлар ирзыҟарҵаз агеноцид иалаӡыз ргәалашәара Амш иазкыз аусмҩаԥгатә.
Мшаԥымза 22 рзы Аԥсны Аҳәынҭқарра адәныҟатәи аусқәа рминистр Олег Барцыц ихы алаирхәит 1941-1945 шықәсқәа рзтәи Аџьынџьтәылатә еибашьра Ду аан анацистцәеи урҭ рыцхырааҩцәеи иҟарҵаз асовет жәлар ргеноцид иалаӡыз ргәалашәара Амш иазкыз, Аԥсны Аҳәынҭқарраҟны имҩаԥысуаз Адунеизегьтәи аҿар Рфестиваль Адирекциа Ахаҭарнакра еиҿнакааз аусмҩаԥгатә.
Аусмҩаԥгатә иалахәын: Аԥсны иҟоу Урыстәылатәи Афедерациа аусқәа рзы аамҭалатәи агәрага Максим Литвинов, Аԥсны Аҳәынҭқарра Адәныҟатәи аусқәа рминистр ихаҭыԥуаҩ инапынҵақәа назыгӡо Иракли Ҭыжәба, Аԥсны Аҳәынҭқарра атәылахьчара аминистр ихаҭыԥуаҩ, астатс-маӡаныҟәгаҩ Давид Бжьаниа, Аԥсны иҟоу Россотрудничество Ахаҭарнакра анапхгаҩы инапынҵақәа назыгӡо Вадим Банников.
Аусмҩаԥгатә ааиртит Аԥсны иҟоу Урыстәылатәи Афедерациа аусқәа рзы аамҭалатәи агәрага Максим Литвинов.
Адәныҟатәи аусқәа рминистр Олег Барцыц иԥсшәаҳәаратә ажәахә аҿы инаҵшьны иазгәеиҭеит асовет жәлар ргеноцид иалаӡыз ргәалашәара Амш ашьақәыргылара даара акрызҵазкуа аԥшьгамҭаны ишыҟоу, аиҳаракгьы аҭоурых ахҩылааразы хықәкыла, иубартә аҽазышәарақәа анымҩаԥысуа, уи ҟалашьа амам.
Олег Барцыц иазгәеиҭеит хара имгакәа ҳабацәеи ҳабдуцәеи ззеицҿагылаз ишәарҭоу аҭагылазаашьақәа рыхәшьарақәа роуроуп, урҭ ацәгьоурақәагьы рхамышҭыроуп ҳәа.
"Еиҳарак уи актуалра аҵоуп аиааира згаз ажәлар рроль аларҟәразы аҽазышәарақәа анубарҭоу аамҭазы. Асовет жәлар ииашаны аиааира згаз жәларуп. Ҳара уажәы аиааира ду изаамҭанытәиу ашықәсхыҵра, Асовет Еидгыла ажәларқәа зегьы иаку ԥхьаҟатәи рҭоурыхи рҷыдареи рзин анырыхьчаз, лаҵара 9 ҳаԥылараны ҳаҟоуп. Ҳ-Аԥсны хәыҷы ажәлар ари азеиԥш иааира агаразы даара акрызҵазкуа алагала ҟарҵеит", - иҳәеит аминистр.
Олег Барцыц инаҵшьны иазгәеиҭеит аҭоурыхтә гәалашәареи аицзеиԥш жәытәи реиқәырхара аҵак ду шамоу.
"Иахьа Аԥсни Урыстәылеи стратегиатә еиҩызцәоуп, партниорцәоуп. Ҳара ԥхьаҟагьы иацаҳҵалоит ҳҭоурыхтә гәалашәара ахьчаразы, аҭоурых ииашоу афактқәа реицакра алмыршаразы аусқәа. Уи акырӡа аҵанакуеит», ҳәа азгәеиҭеит иара.
Аусмҩаԥгатә аҳәаақәа ирҭагӡаны Урыстәылатәи Афедерациа Ахада иҟны иҟоу аҭоурыхтә гәалашәара Амилаҭтә центр иазнархиаз ацәыргақәҵа "Ҿҳәарада. Асовет жәлар ргеноцид" дырбан, иара убас адокументалтә фильм "Ҿҳәарада. Ауаатәыҩса рыхьӡала" дырбан. Иара убасгьы иахьа ихацыркхеит есышықәсатәи акциа «Гьаргь ицаха», уи мҩаԥыслоит лаҵара 9 рҟынӡа.
