Аԥсны Аҳәынҭқарра адәныҟатәи аусқәа Рминистрра аусзуҩцәа МГИМО аҟны рашәара 9 инаркны 11 рҟынӡа имҩаԥысуа апрограмма "Адәныҟаполитикатә ӡбарақәа рыдкылараан аексперт-аналитикатә дгылара" ала иҷыдоу акурс рхы аладырхәуеит.
Ауснагӡатә аҳәаақәа ирҭагӡаны, Аԥсны адәныҟатәи аусқәа рминистрра ахаҭарнакцәеи МГИМО аректор Анатоли Торкунови реиԥылара мҩаԥысит. Аԥсны Аҳәынҭқарра адәныҟатәи аусқәа рминистр ихаҭыԥуаҩ инапынҵақәа назыгӡо Иракли Ҭыжәба МГИМО аректор ҭабуп ҳәа иеиҳәеит Аԥснытәи адипломатцәа рзанааҭтә ҟазара аизырҳареи, жәларбжьаратәи аизыҟазаашьақәа аганахь ала иреиӷьу урыстәылатәи аспециалистцәеи дареи реимадара аусхк аҿы рԥышәа аизырҳаразы ирыҭоу алшаразы.
Аиԥылара алахәылацәа МГИМО ашьаҭала Аԥснытәи адипломатцәа рзы асеиԥш аҵарадырратә инициативақәа рырҿиара азҿлымҳара азаадырԥшит. Аиԥылараҿы иара убасгьы иалацәажәеит Аԥсны адәныҟатәи аусқәа рминистрреи МГИМОи русеицура арӷәӷәара, ҷыдала, ажәалагала ҟаҵан иналукааша урыстәылатәи арҵаҩцәеи аекспертцәеи алархәны МГИМО аԥхынтәи ашкол Аԥсны аиҿкааразы.
Адәныҟатәи аполитикатә ӡбарақәа рыдкылараан аексперти-аналитикатә цхыраара апрограмма ала иҷыдоу акурс иалахәуп: Астратегиатә усеицура Адепартамент аиҳабы Џьемал Бганба, Аконсултә ҟәша аиҳабы Лаша Аҩӡба, Аҳәынҭқарратә протокол аҟәша аиҳабы Алина Ҷана, жәларбжьаратәи -азинтә Департамент аиҳабы Сабина Лакоба, апресс-маҵзура аиҳабы Валериа Цкәуа.
