63-тәи Дамасктәи Жәларбжьаратәи аџьармыкьа аплошьадкаҿы Аԥсны Аҳәынҭқарра апавильон аартра мҩаԥысит.
Апавильон Аԥсны Аҳәынҭқарра акультуреи, атрадициақәеи, аԥсабаратә ҭынхеи аазырԥшуа астиль ала еиҿкаауп. Ахархәара рыҭоуп атәыла аҷыдара иаҵызшьуа аԥсуа архитектуреи акультуреи рмилаҭтә символикеи релементқәа.
Аекспозициаҿы ицәыргоуп аԥсуа аарыхыҩцәа раалыҵ аҿырԥштәқәа, иара убас Аԥсны Аҳәынҭқарра атуристтәи аекономикатәи лшарақәа рзы аинформациатә материалқәа.
Хазы аҭыԥ ааныркылоит Аԥсны аԥсабаратә беиара аҭааҩцәа идзырдыруа иблахкыгоу акәакьқәа рфотосахьақәа.
Апрограмма акрызҵазкуа хәҭаны иҟалеит аԥсуа артистцәа рықәгыларақәа.
Аԥсны Аҳәынҭқарра аделегациа аилазаара иалалеит Аԥсны Аҳәынҭқарра зҽаԥсазтәыз артистцәа Шәарах Абӷаџьааи Дмитри Торчуеи, иара убас В.М. Царгәыш ихьӡ зху аҳәынҭқарратә ашәаҳәареи акәашареи рансамбль артистцәа Лана Ҷанԥҳа, Миранда Барцыцԥҳа, Аслан Гәарамиа, Леуарса Ҳаразиа.
Итрадициатәу ашәақәеи акәашарақәеи рынагӡара аџьармыкьа алахәылацәеи асасцәеи рганахьала аинтерес ду цәырнагеит, акультуратә программа иахәҭакхеит.
Аџьырмыкьа алахәылацәеи асасцәеи аӡәырҩы рзы аԥснытәи апавильон алшара аиуит раԥхьаӡа акәны аԥсны аҳәынҭқарра акультуреи, атрадициақәеи, аалыҵи рдырра.
Аԥсны Аҳәынҭқарра апавильон аусура иацнаҵоит 63-тәи Дамасктәи Жәларбжьаратәи аџьармыкьа ахьынӡанаӡамҩаԥысуа: 2026 шықәса нанҳәа 26 инаркны цәыббра 4 рҟынӡа.
Аџьармыкьа аҩбатәи амш аҳәаақәа ирҭагӡаны иазԥхьагәаҭоуп Аԥсны Аҳәынҭқарра аделегациеи Шьамтәылатәи Арабтә Республика апрофильтә усбарҭақәа рхаҭарнакцәеи, иара убас аџьырмыкьаҿы ицәыргоу атәылақәа рделегациақәеи реиԥыларақәа.
