Рашәарамза 11 рзы авидеоконференцеимадара аформат ала имҩаԥысит Аԥсны Аҳәынҭқарра Адәныҟатәи аусқәа рминистр Олег Барцыц, Приднестровиатәи Молдавиатәи Ареспублика Адәныҟатәи аусқәа рминистр Витали Игнатиев, Аахыҵ Уаԥстәыла Адәныҟатәи аусқәа рминистр Ахсар Џьиоев реилацәажәара.

Адәныҟатәи аусқәа рминистрцәа реилацәажәараан абарҭ азҵаарақәа ирзааҭгылан:

- Аԥсны, Приднестровие, Аахыҵ Уаԥстәыла ирзеиԥшу адәныҟаполитикатә приоритетқәа рынагӡара;

- ареспубликақәа рыкәша-мыкәша иҟоу актуалтә жәларбжьаратә ҭагылазаашьақәа, аҳәынҭқаррақәа рсоциал-економикатә ҿиара анырра азҭо афакторқәа;

- адәныҟаполитикатә усеицура аԥеиԥш змоу ахырхарҭақәеи аформақәеи.

Аԥсны Аҳәынҭқарра Адәныҟатәи аусқәа рминистр Олег Барцыц, Приднестровиатәи Молдавиатәи Ареспублика Адәныҟатәи аусқәа рминистр Витали Игнатиев, Аахыҵ Уаԥстәыла Адәныҟатәи аусқәа рминистр Ахсар Џьиоев ражәахәқәа ирзыӡырҩын.

Олег Барцыц илагалажәаҿы иахьатәи жәларбжьаратәи аҭагылазаашьа Аахыҵ Кавказ, Мрагыларатәи Амшын Еиқәа иаԥну арегион аҿы иҿыцу ааԥхьарақәеи ашәарҭарақәеи рышьақәыргылара алоуп ҳәа иазгәеиҭеит. «Ҳара иалкааны ҳрышьклаԥшуеит ааԥхьара ҿыцқәеи ашәарҭарақәеи рышьақәгылара, оперативла ишьақәҳаргылоит урҭ рызхьаԥшшьа», - иҳәеит аминистр.

Олег Барцыц иазгәеиҭеит: «Приднестровиатәи Молдавиатәи Ареспублика аиҩызаратә, аидгыларатә ҳәынҭқарра акәша-мыкәша имҩаԥысуа апроцессқәа гәҭынчымра дула ҳрыхәаԥшуеит. Приднестровиатәи ҳколлегацәа ргәымшәареи, рдырреи, рыгәаӷьреи, рхачҳареи ҳаҭыр рықәаҳҵоит. Ҳҩызцәа зегь реиҳа имариам аҭагылазаашьақәа раан аус руеит, уи ус шакәу еилыкка еилаҳкаауеит. Ус шакәугьы, Приднестровие адәныҟаполитикатә усбарҭа иаанарԥшуа агәаӷьра, активра, апатуқәҵара ду узцәырнагоит».