Аԥсны адәныҟатәи аусқәа рминистр Олег Барцыци Москва Аиҳабыра рминистр, Москва адәныҟаекономикатәи жәларбжьаратәи аимадарақәа Рдепартамент анапхгаҩы Сергеи Черемини реиԥылара Москва имҩаԥысит.
Аиԥылара рхы аладырхәит Урыстәылатәи Афедерациаҿ аҷыдалкаатә Зинмчы змоу Аԥсны ацҳаражәҳәаҩ Алхас Кәыҵниа, Москва Аиҳабыра рминистр актәи ихаҭыԥуаҩ, Москва ақалақь адәныҟаекономикатәи жәларбжьаратәи аимадарақәеи Рдепартамент анапхгаҩы Игор Ткач, аџьынџьуаа аус рыцуреи аинформациатә политика аиқәыршәареи рзы аусбарҭа анапхгаҩы ихаҭыԥуаҩ Георги Иаковлев.
Аганқәа Аԥсни Москвеи рыбжьара апартниорра арҵаулара иадҳәалоу азҵаарақәа жәпакы ирылацәажәеит.
Аԥсуа ган аинтерес азаанарԥшит адиалог акрызҵазкуа ахырхарҭақәа: акультуратәи агуманитартәи еимдара; атуризми аинвестициақәеи; акреативтә економика аҿиара; асоциалтә усхки аинфраструктуреи рыла аҳҭнықалақь аԥышәа аҿҵаара.
Олег Барцыц инаҵшьны иазгәеиҭеит Аԥсны ацифраркреи асоциалтә политикеи рԥышәа аҭҵаара ишазҿлымҳау, иҳәеит аизыҟазаашьақәа астратегиатә ҟазшьа шрымоу.
"Уи ҳара ҳзы имҩақәҵагоуп, хәы змаӡам ԥышәоуп, шәара шәыцхыраарала ҳтәылаҿы арҿиаратә хархәара ҳгәы иҭоуп", — иҳәеит Олег Барцыц.
Олег Барцыц ҷыдала иҭабуп ҳәа ахиҳәааит ВДНХ аҿы иҟоу апавилион "Аԥсны" аиҭашьақәыргылараҿы Урыстәыла иҟанаҵо адгыларазы.
«Ари ҳаамҭазтәи аплошьадка – адыԥхьалара иаҭыԥны, Урыстәыла агәаҿы зыԥсы ҭоу аԥсуа культуреи адоуҳаи ирсимволны иҟалоит. Ари апроект еснагь адгылара ахьашәҭо ҳара ҳзы аҵак дуӡӡа амоуп", ҳәа инаҵшьны иазгәеиҭеит адәныҟаполитикатә усбарҭа аиҳабы.
Анаҩстәи аусеицура ахырхарҭақәа ируакны аминистр иазгәеиҭеит акреативтә економика аҿиара.
Аминистр акреативтә економика аусхк аҟны аусеицура аҵак ду шамоу азгәеиҭеит.
«Ҳара ҳақәгәыӷуеит Москва Аиҳабыра Аԥсны акреативтә индустриақәа рзы ҳаамҭазтәи аекосистема аԥҵара ахықәкы анагӡаразы акреативтә индустриақәа Рмаҵзуреи ҳареи апартниортә еизыҟазаашьақәа ҳабжьаҵараҿы ацхраара ҳарҭап ҳәа. Агәра ганы сыҟоуп еицаҳзеиԥшу апроектқәа иаарласны, зхаҭабзиара ҳараку алҵшәақәа аадырԥшуа ишалаго», - иҳәеит Олег Барцыц.
Аконструктивтәи аиҩызаратәи ҭагылазаашьа аманы имҩаԥысыз аиԥылараҿы иҳараку, амаҭәартә ҩаӡараҿы хра злоу аусеицура шхымԥадатәиу азы иаку апозициа азгәаҭан. Аганқәа ишьақәдырӷәӷәеит аусеицура иалкаау апроектқәа ихарҭәааны апрактикатәнагӡара рыҭара ргәы ишҭоу.
