Жәларбжьаратәи женеватәи аиҿцәажәарақәа 55-тәи рраунд азы

Жәларбжьаратәи женеватәи аиҿцәажәарақәа 55-тәи рраунд азы
8 December 2021 171

Ԥхынҷкәын 7-8, 2021 шықәсазы Женева имҩаԥысит Аахыҵ Кавказ ашәарҭадареи аҭышәынтәалареи рзы Жәларбжьаратәи женеватәи аиҿцәажәарақәа 55-тәи рраунд, Аԥсны Аҳәынҭқарра, Аахыҵ Уаԥстәылатәи Ареспублика, Қырҭтәыла, Урыстәылатәи Афедерациа, ЕАА, ацхантәаҩцәа ООН, ЕС, ОБСЕ злахәыз.

Аԥснытәи аделегациа напхгара аиҭон Адәныҟатәи аусқәа рминистр ихаҭыԥуаҩ Иракли Ҭыжәба. Аделегациа иалахәын: Аԥсны ахада Иусбарҭа анапхгаҩ ихаҭыԥуаҩ Саида Быҭәба, Аԥсны АШәМ ахантәаҩ ихаҭыԥуаҩ Заал Хәарцкьиа, Аԥсны Жәлар реизара адепутатцәа Каха Пертаиа, Натали Смыр, Инал Тарба, Аԥсны асанитартә ҳақьым хада Лиудмила Скорик, Адәныҟатәи аусқәа рминистрра аусзуҩцәа Лаша Аҩӡба, Артур Гагәылиа, Мадина Шамба.

Амшхәаԥштә азҵаара иалацәажәон атрадициатә ҟазшьа аманы: ҩ-усутә гәыԥкны, ашәарҭадареи агуманитартәи зҵаарақәа рзы.

Аимак-аиҿак алахәылацәа, ақырҭуа делегациа рыда, Аԥсни Қырҭтәылеи рҳәааҿы аҭагылазаашьа ҭышәынтәалоуп ҳәа ахырҳәааит. Убри аан иазгәаҭан аҳәаа аамҭа-аамҭала Қырҭтәыла атәылауаа ишеиларго.

Ҷыдала иазааҭгылан Гал ақалақь аҿы имҩаԥысло аинцидентқәа раԥырҟәҟәаареи рызхьаԥшреи рзы амеханизм (МПРИ) аусура. Аԥснытәи аделегациа иазгәарҭеит ари амеханизм адгылара шарҭо, иҟарҵеит ажәадгалақәа МПРИ аформат аусура аиҵыхразы.
Аԥснытәи аган аҽазныкгьы агәҭынчымра аанарԥшит Қырҭтәыла арратә патенциал иахьазнарҳауазы. Хазы иазхьаԥшын Қырҭтәылеи ЕААи рырра-техникатә еинырра, америкатәи аӷбақәа Амшын еиқәа лассы-лассы рҭалара, Аԥсны аҳауатә ҵакыра аилагара. Инаҵшьны иазгәаҭан ари аҩыза аҭагылазаашьа арегион аҿы ашәарҭара шаԥнаҵо.

Аԥснытәи аган ақырҭуа делегациа ирыдыргалеит аҳәынҭқарратә ҳәаа аделимитациеи адемаркациеи рыпрацедура алагара. Иҳәан ари азҵаарақәа жәпакы рҭыԥ ишықәнаҵо.
Аԥснытәи аган ихымԥадатәны иашьеит амч ахамырхәаразы жәларбжьаратәи агарантиақәа рзы адокумент атекст азы аусура ахацыркра.

Ақырҭуа ган ари алацәажәара мап ацәнакуеит. Аҩбатәи аусутә гәыԥ аусура аҳәаақәа ирҭагӡаны агуманитартә ҟазшьа змоу азҵаарақәа – аҵара, анеиҭаҵааиҭаҵра уҳәа, ирылацәажәан.

Аахыҵ Кавказ ашәарҭадареи аҭышәынтәалареи рзы Жәларбжьаратәи женеватәи аиҿцәажәарақәа 56-тәи рраунд азыԥхьагәаҭоуп 2022 шықәса хәажәкыра 29-30 рзы.

Иҵоуроу азхьарԥшқәа

 
 
 
X

Форма обратной связи

ФИО:
E-MAIL:
Телефон:
Ваше сообщение: