Рашәарамза 12 рзы Аҧсны Аҳәынҭқарра Адәныҟатәи аусқәа рминистр Инал Арӡынба Аԥсны иҟоу Урыстәылатәи Афедерациа ацҳаражәҳәаҩ Михаил Шургалин Урыстәыла Амш идиныҳәалеит.

Адныҳәалараҿы, ҷыдала, иҳәоуп:

«Ҳаҭыр зқәу Михаил Александр-иԥа, хаҭала сареи Аԥсны адәныҟатәи аусқәа рминистрра аколлективи ҳахьӡала Урыстәыла Амш шәыдаҳныҳәалоит.

Иуҳәар ҟалоит абри амш - 1990 шықәса рашәара 12 инаркны ихацыркхеит ҳәа имариамыз, хьӡи-ҧшеи зцыз ашьақәгылареи аҿиареи рымҩа ианысыз урыстәылатәи аҳәынҭқарра аҭоурых ҿыц. Урыстәыла ажәлар рыҧсадгьыл иазгәдууп, уаҵәтәи рҧеиҧшгьы агәра ргартә иҟоуп иахьа.

Акрызҵазкуа абри амш аҽны, ҳаҭыр зқәу Михаил Александр-иԥа, ишәзеиҕьасшьарц сҭахуп агәабзиара, агәамч, аҭакҧхықәра зцу аҳәынҭқарратә усураҿы аринахысгьы аихьӡарақәа, Урыстәыла ажәларқәа – аҭынчра, аизҳазыҕьара.»