Абҵара 11 рзы Аԥсны Адәныҟатәи аусқәа рминистрраҿы имҩаԥысит аминистр Даур Ақаҩбеи Аԥсны-Австриатәи аиҿкаара аиҳабы Патрик Поппели реиԥылара.
Патрик Поппель инарҭбааны далацәажәеит Аԥсны-Австриатәи аиҿкаара аусуратә планқәа. Иазгәеиҭеит аиҿкаара иахықәкы хаданы ишыҟоу Аԥсны Аҳәынҭқарреи Австриатәи Ареспубликеи рыбжьара акультуратәи агуманитартәи усхкқәа рҟны реизыҟазаашьақәа рырҭбаареи реиизырҳареи. Поппель иҳәеит аиҿкаара Аԥсны Аҳәынҭқарра Австриа ауааԥсыра рыбжьара аӡбахә аларҵәара шымҩаԥнаго, иара убасгьы аҽазышәара шыҟанаҵо Европантәи ауаа Аԥсныҟа турист ҳасабла раара алыршара.
Даур Ақаҩба иазгәеиҭеит иаԥҵоу аиҿкаара аҵак ду аманы ишиԥхьаӡо, аиҿкаара иаус хаданы ишибо адунеитә уаажәларра рҟынӡа Аԥсны аӡбахә иаша анагара.
Патрик Поппель Аԥсны-Австриатәи аиҿкаара ашәҟәы иҭеигалеит 2019 шықәса жьҭаара 11 рзы, Австриа.