Шьамтәылатәи Арабтә республикаҟны иҟоу Аԥсны ацҳаражәҳәаҩ Муҳаммад Алии Шьамтәыла Астудентцәа рмилаҭтә Еидгыла ахада Дарин Сулеимани аиԥылара мҩаԥыргеит. Аиԥылара рхы аладырхәит Аԥсны Аҳәынҭқарра Ацҳаражәҳәарҭа абжьгаҩ Геис Аль-Ҳарки, Шьамтәыла астудентцәа Рмилаҭтә Еидгыла адәныҟатәи аимадара аҟәша аиҳабы, адоктор Али Баракаҭ.
Аԥсни Шьамтәылеи рыбжьара аусеицуреи астуденттә, аҭҵаарадырратә, академиатә еизыҟазаашьақәа рыҿиареи иара убасгьы Аԥсны ацҳаражәҳәаҩ Шьамтәылатәи астудентцәа Рмилаҭтә Еидгыла аҟәша Аԥсны аԥҵаразы иҟаиҵаз ажәадгалеи ирылацәажәеит аиԥылараҿы.
Аԥсны Аҳәынҭқарраҿы Шьамтәылатәи Арабтә республикаҟынтәи астудентцәа рыдыркылоижьҭеи иҵуеит ҩы-шықәса. Иара убас, аҩ-тәылак рнапхгарақәа Аԥснытәи аҳәынҭқарратә университети Дамасктәи ауниверситети рыбжьара аҭҵаарадырратә усеицуразы аиқәшаҳаҭреи Аԥсны аҵараз Аминистрреи Шьамтәыла иреиҳау аҵараиураз Аминистрреи рыбжьара иреиҳау аҵарадырра ахырхарҭала аусеицуразы аиқәшаҳаҭреи рыбжьаҵарала аҭҵаарадырратә усеицура арӷәӷәареи арҭбаареи рзы аусурақәа мҩаԥыргоит.
Дарин Сулеиман иазгәеиҭеит Шьамтәылатәи астудентцәа Рмилаҭтә Еидгыла атәыла аҵаратә ԥсҭазаара аҿиараҿы, ауниверситети ауаажәларреи рыбжьара аимадараҿы, аҳәаанырцә аҵара зҵо астудентцәеи рыԥсадгьыли рыбжьара аимадара арӷәӷәараҿы, иара убасгьы урҭ ркультуратә, рполитикатә, рҵарадырратә усмҩаԥгатәқәа рымҩақәҵараҿы аҭыԥ ду шааннакыло.
