Потсдам ақалақь аҿы, акультура-усутә еимадара аҳәаақәа ирҭагӡаны, Аԥсны Аҳәынҭқарра иазкыз ахәылԥаз мҩаԥысит. Германиатәи аиҿкаара "Old Tablers", иара убасгьы уи анапхгара алахәыла Иорг Баут иҟарҵаз ааԥхьарала еиҿкааз аусмҩаԥгатә рхы аладырхәит Германиа иҟоу абизнеси акультуреи рхаҭарнакцәа.

Германиа иҟоу азинмчнагӡа змоу Аԥсны Аҳәынҭқарра ахаҭарнак Хьыбла Амҷыԥҳа аиҿкааҩцәа ҭабуп ҳәа ралҳәеит ас еиԥш акыр зҵазкуа аҭыԥ аҿы Аԥсны ахьӡ аӡыргараз алшара ахьыҟарҵаз азы. Лара лықәгылараан иара убасгьы иазгәалҭеит Аԥсни Германиеи, иара убасгьы иааизакны Европеи ирыбжьоу аҭоурыхтә еимадарақәа ртәы.

Аиԥылара аҳәаақәа ирҭагӡаны, Аԥсны Аҳәынҭқарра Ахәаахәҭра-Ааглыхратә Палата ахаҭарнак Вольфганг Мацке Аԥсны Аҳәынҭқарра Ахәаахәҭра-Ааглыхратә Палата аалыҵқәа ӡыригеит, ареспублика ҳаамҭазтәи аҿиара, уи иахьатәи аԥсҭазаара, иара убас, атуризми аинвестициақәеи ирымоу алшарақәа ртәы дрылацәажәеит.

Аусмҩаԥгатә аҳәаақәа ирҭагӡаны, Аԥсны Ахәаахәҭра-Ааглыхратә Палата англыз бызшәала иҭнажьыз афильм дырбан. Уи еизаз рыбжьара аинтерес ду цәырнагеит. Ахәылԥаз асасцәа активла аспикерцәа азҵаарақәа рырҭон, Аԥсны гәык-ԥсык ала ишазҿлымҳаз аадырԥшуан. Аӡәырҩы ареспублика аԥсабара аԥшӡара абареи акультуратә ҭынха адырреи рзы агәазыҳәарақәа аадырԥшит.

Ахыҵхырҭа: Афедеративтә Республика Германиа иҟоу Аԥсны Аҳәынҭқарра еснагьтәи Ахаҭарнакра.