Аԥсны Аҳәынҭқарра адәныҟатәи аусқәа рминистрра Приднестровиатәи Молдавиатәи ареспублика адәныҟатәи аусқәа рминистррахь Приднестровиатәи Молдавиатәи ареспублика ақалақь Бендера аҿтәи атрагедиа 33 шықәса ахыҵра инамаданы адашшылара ҟанаҵеит.
Адашшылараҿы иаҳәоит:
«Ари арыцхә – аибашьра агәымбылџьбарареи, Приднестровие ауааԥсыра рхақәиҭреи рхатәҳәаақәҵареи рзы рықәԥараҿы харҭәаашьа змам рцәыӡқәеи ҳгәаланаршәоит. Приднестровие аҭынч уааԥсыреи ахьчаҩцәеи рҟынтә иҭахаз ҳгәалаҳаршәоит.
Ахьыԥшымразы зхатәы еибашьра иацәынхаз Аԥсны ажәлар инарҵауланы еилыркаауеит ацәыӡ ахьаа закәу. Ҳара еснагь иаҳгәалашәалоит Приднестровие ажәлар рфырхаҵареи, аиашамра аҿаԥхьа иаадырԥшыз агәыӷәӷәареи».