Аԥснытәи аҳәынҭқарратә университет аҿы имҩаԥысыз, 2025 шықәсазтәи Аихшьала ҭҵаарадырра-практикатә конференциа аартреи апленартә еилатәареи ихы рылаирхәит Адәныҟатәи аусқәа рминистр Олег Барцыц.

Аартра иалахәын Жәлар Реизара аиҳабы Лаша Ашәба, аԥыза-министр Владимир Делба, аҵара аминистр Хана Гәынба, адәныҟатәи аусқәа рминистр Олег Барцыц, агәабзиарахьчара аминистр Едуард Быҭәба, Аԥсны иҟоу Россотрудничество ахаҭарнакра анапхгаҩы инапынҵақәа назыгӡо Вадим Банников, апрофессор-рҵаҩратә еилазаара, астудентцәа.

Ажәахәқәа ҟарҵеит: ААУ аректор, РАЕН академик Алеко Гәарамиа, аҭҵаарадырразы аректор ихаҭыԥуаҩ, АМАН академик, апрофессор Џьульетта Адлеиба.

Апленартә еилатәараан ирзыӡырҩит ажәахәқәа: абиол. ҭҵаарадыррақәа рканд., адоц. Лариса Аҳәба: «Апатологиатәи ацәеижьтәи жәра рбиомаркерқәеи ақәра ду нызҵыз ихазхаҭалатә паспорт ашьақәыргылараҿы урҭ рхархәараз алшарақәеи"; афиз. - мат. Ҭҵаарадыррақәа рконд., адоц. Хаути Озов: «Аԥснытәи аҳәынҭқарратә университети апартниорцәеи реинырра иазкны –Агроинџьныртә факультет акафедра «Аенергетикатә системақәа» аҿырԥштәы ала; аекон. ҵаарадыррақәа рканд., адоц. Инга Арӡынԥҳа: «Адемографиатә суверенитет амилаҭтә шәарҭадара аконтекст ала"; азиндырратә ҭҵаарадыррақәа рканд., арҵаҩы Константин Амқәаб: «Аԥсны Аҳәынҭқарраҿы аҳәынҭқарратә напхгараҭара асистема аҽеиҭакразы: аинституционалтә аспектқәа»; аспирант Даниил Козловски: «Агенеративтә бызшәатә модельқәа иаԥырҵаз атекстқәа рхаҭара ашьақәыргыларазы алингвистикатәи астатистикатәи маркерқәа".

Апленартә еилатәара анхыркәшаха Аԥсны аҵара Аминистрреи Аԥснытәи Аҳәынҭқарратә университети аусеицуразы аиқәшаҳаҭра рнапы аҵарҩит. Адокумент рнапы аҵарҩит аҵара аминистр Хана Гәынбеи ААУ аректор Алеко Гәарамиеи.