Аԥсны адәныҟатәи аусқәа рминистр Олег Барцыц Аԥсны иҟоу Россотрудничество Ахаҭарнакра еиҿнакааз ажурналистцәеи аблогерцәеи рыбжьара аицлабра «Взгляд-2025» афинал аҿы адныҳәаларатә ажәахә ҟаиҵеит.

Аминистр иқәгылараҿы инаҵшьны иазгәеиҭеит 16 шықәса инеиԥынкыланы Россотрудничество активла излахәны имҩаԥысуа, Аԥсны Аҳәынҭқарреи Урыстәылатәи Афедерациеи рыбжьара агуманитартәи аинформациатәи усеицура шықәсырацәалатәи атрадициақәа. Иара ҭабуп ҳәа реиҳәеит аҳәаанырцә иҟоу ҳџьынџьуаа русқәеи жәларбжьаратәи агуманитартә усеицуреи рзы Афедералтә маҵзуреи, иара убас амаҵзура анапхгаҩы Евгени Примакови Аԥсны иҟоу Россотрудничество Ахаҭарнакра ахада инапынҵақәа назыгӡо Татиана Степановеи.

Аминистр ҷыдала дазааҭгылеит аицлабра Аԥсны Афырхаҵа, 1992-1993 шш. Рзы Аԥсны Жәлар Рџьынџьтәылатәи еибашьраҿы иҭахаз афотокорреспондент Андреи Соловиов игәалашәара ишазку, иара убас аҭоурыхтә гәалашәара аиқәырхареи Аџьынџьтәылатәи еибашьра Дуӡӡа ахҭысқәа реицакра аҿагылареи иахьа аҵак ду шамоу.

Иазгәаҭан 2025 шықәса Аԥсны раԥхьатәи ахада Владислав Арӡынба ишықәсны ишшьо.

Аԥсны АдәА Рминистрра ахада инаҵшьны иазгәеиҭеит ҳаамҭазы аҭакзыԥхықәу, иобиективу ажурналистика аҵакы шамоу, агәыӷра ааирԥшит аҳамҭақәа зегь реиҳа иаԥсоу алахәылацәа ироуп ҳәа, аноминантцәа зегьы ақәҿиарақәа рзеиӷьеишьеит, аиҿкааҩцәа иҭабуп ҳәа реиҳәеит аицлабра шьахәрыла амҩаԥгаразы.