Аԥсны Адәныҟатәи аусқәа рминистрраҿы, ԥхынҷкәын 1 азы, аминистр ихаҭыԥуаҩ Одиссеи Бигәаа жәларбжьаратәи аицлабрақәа "Кубок Небесная грация" зхы рылазырхәыз, жәа-шықәса зхыҵуа агимнастка Софиа Боџьгәуа дидикылеит.
Аспортсменка ааигәа дхынҳәит Пекин ақалақь аҿы абҵарамза 12-14 рзы имҩаԥысыз жәларбжьаратәи аицлабрақәа «Кубок Небесная грация», Beijing Top Open 2025 рҟынтәи, уаҟа лара зеиԥш зшьала 26-тәи аҭыԥ аанылкылеит.
Аиԥылара иалахәын адәныҟатәи аусқәа рминистр ицхырааҩ Дмитри Амҷба, Аԥсны асахьаркыратә гимнастика Афедерациа ахада Гәында Кәарҷиа, аспортсменка лазыҟаҵаҩ Маргарита Камынина, агимнастка лан Анна Боџьгәуа.
Одиссеи Бигәаа Софиа Адәныҟатәи аусқәа рминистр Олег Барцыц ихьӡала длыдныҳәалеит. Аминистр ихаҭыԥуаҩ иазгәеиҭеит, аԥсуа спортсменцәа ҿарацәа рықәҿиарақәа агуманитартә еимадара арӷәӷәареи, Аԥсны аҳәаанырцәгьы ипозитивтәу аимидж аиуреи рус аҿы акыр зҵазкуа алагала шыҟарҵо.
«Адәныҟатәи аусқәа Рминистрра аринахысгьы Аԥсны абаҩхатәра злоу аҿар рыцхыраара иацнаҵалоит», ҳәа инаҵшьны иазгәеиҭеит Одиссеи Бигәаа.
Аԥсны аспорти акультуреи рхаҭарнакцәа жәларбжьаратәи аренаҿы аицлабрақәа ианрылахәу, лассы-лассы аԥынгылақәа роуеит, уи зыхҟьо Қырҭтәыла иааҟәымҵӡакәа ареспублика аҭахкааразы иҟанаҵо аҽазышәарақәеи Мраҭашәаратәи атәылақәа ҩ-стандартк рыла имҩаԥырго аполитикеи роуп ҳәа иҳәеит иара.
Бигәаа инаҵшьны иазгәеиҭеит аспортсменка қәыԥш иаалырԥшыз ақәҿиарақәа еиҵагыло аҿар рзы иҿырԥшы бзиоуп, ргәы азҭанаҵоит ҳәа.
Одиссеи Бигәаа иҳәеит агәрагара шимоу – Софиа иаалырԥшуа аџьабзиабара, аус аҽадцалара, ахықәкынагӡара аҽазышәара лаԥхьаҟа еиҳагьы еиҳау аҩаӡарақәа рахь дкылыргоит ҳәа.
Иара хазы ҭабуп ҳәа леиҳәеит Жәларбжьаратәи Ассоциациа "Небесная грация" ахада, Аолимпиатә чемпион Алина Кабаева аԥснытәи аспортсменка илылҭаз адгыларазы.