1999 шықәсазы жьҭаарамза 12 азы Аԥсны Аҳәынҭқарра Ахада Владислав Арӡынбеи, Жәлар Реизара Ахантәаҩы Сократ Џьынџьали, Жәлар Реизара адепутатцәеи рнапы аҵарҩит “Аԥсны Аҳәынҭқарратә хьыԥшымразы” Азакәан. Ари ахҭыс аԥхьа, 1999 шықәсазы, ареферендум мҩаԥысит, Аԥсны Аҳәынҭқарра Иреиҳаӡоу Ахеилак 1994 шықәса абҵара 26 азы ирыдыркылаз Аԥсны Аҳәынҭқарра Аконституциа ишадгыло азы атәылауаа рҟынтәи 97,7% рыбжьы рҭиит.

«Аԥсны Аҳәынҭқарратә хьыԥшымра азы» Азакәан ала Аԥсны Аҳәынҭқарра асуверентә ҳәынҭқарратә статус азинтә шәҟәҭагалара апроцесс хыркәшахеит. Ажәлар ргәазыҳәара шьаҭас иҟаҵаны, Аԥсны Аҳәынҭқарратә хьыԥшымра шьақәдырӷәӷәеит, ирылаҳәан. Иара убас ЕАР, ОБСЕ, адунеи аҳәынҭқаррақәа зегьы рахь ааԥхьара ҟаҵан хақәиҭрала ахалахатәҳәаақәҵара азин шьаҭас иҟаҵаны, Аԥсны жәлар иаԥырҵаз ихьыԥшым аҳәынҭқарра азхаҵаразы.