Аԥсны адәныҟатәи аусқәа рминистр Олег Барцыци Урыстәыла адәныҟатәи аусқәа Рминистрра Москватәи жәларбжьаратәи аизыҟазаашьақәа рзы Аҳәынҭқарратә Институт аҟны иҟоу жәларбжьаратәи аҭҵаарақәа Ринститут иԥхьагылоу анаукатә усзуҩ, аполитолог, ажурнал «Международная аналитика» аредактор хада Сергеи Маркедонови реиԥылара мҩаԥысит 2025 шықәса жьҭаарамза 3 рзы Аԥсны адәныҟатәи аусқәа Рминистрра аҟны.

Аиԥылараҿы арегионалтәи жәларбжьаратәи амшхәаԥштә ала еиҳа актуалра злоу азҵаарақәа, иара убас аԥсны-урыстәылатәи аусеицуратә еизыҟазаашьақәа ирыдҳәалоу азҵаарақәа жәпакы рыла ргәаанагарақәа еибырҳәеит.

Ҷыдала ахшыҩзышьҭра аҭан адипломатиатә ҵарадырреи Аԥсны адәныҟатәи аусқәа Рминистрра аусзуҩцәа ркадыртә зыҟаҵареи, Москватәи жәларбжьаратәи аизыҟазаашьақәа рзы Аҳәынҭқарратә Институт абазала уахь иналаҵаны, иара убас урыстәылатәи анаукатәи аексперттәи аилазаарақәа аус рыцура рганахьала аусеицура аформат.

Олег Барцыц Сергеи Маркедонов иҭабуп ҳәа еиҳәеит Аԥсны аганахьала иааирԥшуа ахшыҩзышьҭра азы. Уи убри аан Урыстәыла аексперттә еилазаара Аԥсны иадҳәалоу азҵаарақәа разҿлымҳара акырӡа аҵак ду амоуп ҳәа инаҵшьны иазгәеиҭеит.

Иара иарбоу аусхкы ала аимадара арҿиара жәларбжьаратәи арена аҿы ареспублика еиҳа обиективла азнеира алнаршоит ҳәа инаҵшьны иҳәеит.