2021 шықәса рашәара 14 азы Бриуссель имҩаԥысыз НАТО асаммит аҟны икьыԥхьын Аҩадатлантикатә алианс азы иактуалу ашәарҭарақәа зныԥшуа аҳәамҭа.

Аҳәамҭа 14-тәи апункт аҿы ишаҳәо ала НАТО алахәыла-тәылақәа ирхашҭуам «Қырҭтәыла аҵакыратә акзаареи асуверинитети рыпринцип» адгылара шаҭатәу.

НАТО атәылақәа реихшьаалатә ҳәамҭаҿы аҽазныкгьы иаарԥшын ари Аҩадатлантикатә алианс азы инорманы иҟалаз иҩбоу астандартқәа. Убри аан Бриуссель бзиарыла изыхцәажәо атәылақәа рахь иаҵанакуа реиҳара ЕААИ Европа атәылақәеи роуп. Иара НАТО ахаҭа атәылақәа.

Асаммит аҳәамҭаҿы традициатә ҟазшьаны ишыҟалаз ала Урыстәылахь адҵаҟаҵара мҩаԥган, ҷыдала Қырҭтәыла ар алнагарц, Аԥсны ахьыԥшымра азхаҵара архынҳәырц, амиф ҟазшьа змоу амцаԥшь ааннакыларц. Арҭ адҵақәа рыхшыҩдара дарбанызаалак ибарҭоуп, 2008 шықәсазы Аԥсни Аахыҵ Уаԥстәылеи иҟалази уи ашьҭахь Аԥсни Аахыҵ Уаԥстәылеи Урыстәылатәи Афедерациа ишазханаҵази ртәы здыруа. Аԥсны азхаҵара аполитика-зинтә акт жәларбжьаратәи азин анормақәеи апринципқәеи ирықәшәон, егьырҭ атәылақәа уи рақәшаҳаҭхара аҭахны иҟамызт. Москвеи Аҟәеи рыбжьара атәылахьчареи ашәарҭадареи русхк аҟны ҩ-ганктәи аиқәшаҳаҭра акәзаргьы жәларбжьаратәи азинтә нормақәа ирҿагыломызт. Қырҭтәыла аҵакыратә акзаара адгылара азҭо НАТО атәылақәа 2008 шықәсазы М.Саакашьвили ирежим ахымҩаԥгашьа иахҟьаны иӡыз аполитикатәи азинтәи ыҟазаара ауп ирыхьчо.

Аҩадатлантикатә алианс аҳәамҭаҿы аҵак ду аҭоуп Женеватәи аиҿцәажәарақәа рхымԥадара аха убри аан НАТО ибзиоуп ҳәа ахнаҳәаауеит Қырҭтәыла Женева имҩаԥнаго иконструктивм акурс – амч ахамырхәаразы адокумент анапаҵаҩра.

Уи адагьы НАТОи Қырҭтәылеи рырратә еиҩызахара Қарҭ аҭынчрабзиабаратә курс амҩаԥгара иацхраараны иҟам, еиҳагьы иамырцыхцыхуазар.

Агәра ганы ҳаҟоуп НАТОи Қырҭтәылеи реивахәмарра Аахыҵ Кавказ аҿы ашәарҭадара ҵнашәаауеит, Женеватәи аиҿцәажәарақәа рлахәылацәа русурагьы лҵшәаданатәуеит ҳәа.